ნორვეგიის საგარეო საქმეთა მინისტრმა, ესპენ ბარტ ეიდემ განაცხადა, რომ ნატოს წევრი ქვეყნების აბსოლუტური უმრავლესობა არ აპირებს ჯარების განლაგებას უკრაინაში ადგილზე საბრძოლველად. ინფორმაციას ამის შესახებ უკრაინული მედია ავრცელებს.
“ვფიქრობ, რომ ნატოს წევრი სახელმწიფოების თითქმის ყველა მთავრობამ მკაფიოდ განაცხადა, რომ ჩვენ არ განვიხილავთ უკრაინაში რეალურ ბრძოლაში ჯარების მონაწილეობის შესაძლებლობას. ჩვენ მხარს ვუჭერთ უკრაინის ბრძოლას, რადგან ეს ასევე ჩვენი ბრძოლაა, მაგრამ ვფიქრობთ, რომ უზარმაზარი განსხვავებაა იარაღით, წვრთნებით, აღჭურვილობითა და ტექნოლოგიებით მხარდაჭერასა და ადგილზე ყოფნის შორის. ეს არ არის ის, რის გაკეთებასაც ვგეგმავთ. არსებობს კარგი მიზეზები, რომ ეს არ მოხდეს, ამ ომის ბუნების გათვალისწინებით”, – აღნიშნა ნორვეგიის საგარეო საქმეთა მინისტრმა.
მან ხაზგასმით აღნიშნა, რომ ყველა ქვეყანამ მეტი უნდა გააკეთოს უკრაინის მხარდასაჭერად.