ევროკავშირის საგარეო პოლიტიკის ხელმძღვანელმა, ჟოზეფ ბორელმა ვაშინგტონში გამართული შეხვედრების შემდეგ განაცხადა, რომ უკრაინისათვის მხარდაჭერის ახალი პაკეტის უზრუნველყოფა გადაუდებელია, რადგან უკრაინაში ომის შედეგი გაზაფხულსა და ზაფხულში გადაწყდება.
ბორელმა ჟურნალისტებს განუცხადა, რომ მისი გზავნილი აშშ-ის პოლიტიკოსებისთვის შემდეგი იყო: “ის, რაც უნდა გაკეთდეს [უკრაინისათვის], სწრაფად უნდა გაკეთდეს”.
“ჩვენ უნდა გავაქტიურდეთ. ჩვენ უნდა გავზარდოთ ჩვენი მხარდაჭერა, გავაკეთოთ მეტი და სწრაფად. სწორედ ამიტომ ვზრდით თავდაცვითი მრეწველობის შესაძლებლობებს. და ეს ასევე ეხება აშშ-ს”, – აღნიშნა ბორელმა.
“მომდევნო თვეები იქნება გადამწყვეტი. ბევრი ანალიტიკოსი ელოდება რუსეთის მთავარ შეტევას ამ ზაფხულს და უკრაინა ვერ დაელოდება აშშ-ის არჩევნების შედეგებს”, – დასძინა მან.