“სალომე ზურაბიშვილს ძალიან ეშლება ტერმინებშიც და საქციელშიც, მის ადგილზე ბოლშევიზმზე არ ვისაუბრებდი”

სალომე ზურაბიშვილს ძალიან ეშლება ტერმინებშიც და საქციელშიც, – ამის შესახებ პარლამენტის ვიცესპიკერმა, გია ვოლსკიმ განაცხადა.

ამ კომენტარით ვოლსკი გამოეხმაურა სალომე ზურაბიშვილის განცხადებას, რომლის თანახმად, ანსამბლი „ფესვები“, რომელიც აჭარიდან პრეზიდენტის სასახლეში უნდა ჩასულიყო, გზიდან გააბრუნეს, რაც “კულტურული ბოლშევიზმია”.

“საერთოდ, სალომე ზურაბიშვილის ადგილზე ბოლშევიზმზე ნაკლებად ვისაუბრებდი. შეიძლება შენ თავს დაარქვა ბოლშევიზმის წინააღმდეგ მებრძოლი, მაგრამ რეალურად შენი საქმით იყო ისეთ პარტიულ თუ პოლიტიკურ ფიგურებთან, რომლებიც ბოლშევიზმისა და ფაშიზმის ელემენტებს შეიცავენ თავის მოქმედებებსა და პოლიტიკაში. ასე რომ, ამ თემასთან დაკავშირებით, მგონი, არასწორი წარმოდგენა აქვს.
თუ რომელიმე ანსამბლი არსებობს, მღერის ან მოღვაწეობს ჩვენთან ხელოვნების ასპარეზზე, არავისთვის არავის უკითხავს, რომელ პოლიტიკურ ძალას უჭერს მხარს. ნებისმიერ ღონისძიებაზე ყველა არტისტი ერთი უფლებით სარგებლობს განსხვავებით იმ ბოლშევიზმისგან თუ ფაშიზმისგან, რომელიც სალომე ზურაბიშვილის მოკავშირეებს ჰქონდათ დამყარებული 2012 წლამდე. “შავი სიები” არსებობდა ხელოვანებისა, რომელთაც არსად უნდა მოეღოთ მონაწილეობა. ამის შესახებ თავადაც იცის, მაგრამ მოსწონდა ალბათ ასეთი პოლიტიკა.
რაც შეეხება ანსამბლის უკან გაბრუნებაში სუს-ის ჩართულობას, ეჭვი მეპარება. საერთოდ, ეს ცრუპენტელობა ახასიათებს ზოგიერთს. არ მგონია, რომ ამ საკითხებთან დაკავშირებით შეიძლება რაიმე ისეთი არსებობდეს, რაზეც სალომე ზურაბიშვილი ლაპარაკობს. “შავი სიები” არსებობდა, ბოლშევიზმიც იყო, ფაშიზმიც; ხელოვანები შეზღუდულები იყვნენ, თუ “ნაცმოძრაობისგან” მწვანე შუქი არ ჰქონდათ. ახლა ასეთი რამ არ ხდება და მადლობა ღმერთს. სახელოვნებო სივრცეში ვხედავთ ყველას – თეატრები, ანსამბლები, ცალკეული შემსრულებლები გაბნეულები არიან სხვადასხვა პოლიტიკური გემოვნების ნიშებში, მაგრამ ერთად არიან, როდესაც რაიმე ღონისძიება ტარდება. ეს ჩვენი პოლიტიკაა და ვფიქრობ, სალომე ზურაბიშვილს ძალიან ეშლება ტერმინებშიც და საქციელშიც”,- განაცხადა გია ვოლსკიმ.

ცნობისთვის, საქართველოს პრეზიდენტის სალომე ზურაბიშვილის განცხადებით, ანსამბლი „ფესვები“, რომელიც აჭარიდან უნდა ჩამოსულიყო, გზიდან გააბრუნეს, “თურმე პრეზიდენტის სასახლეში ნებადართული არ არის მოღვაწეობა”.