აზერბაიჯანში საქართველოს საგანგებო და სრულუფლებიანმა ელჩმა, ზურაბ პატარაძემ საქართველოს პრემიერ-მინისტრის აზერბაიჯანში დღეს დაგეგმილი ვიზიტი მედიასთან შეაფასა.
„ძალიან მნიშვნელოვანია, რომ საქართველოს პრემიერ-მინისტრის პირველი რეგიონული ვიზიტი იწყება აზერბაიჯანის რესპუბლიკიდან. დაგეგმილია უმაღლესი დონის შეხვედრები ბატონ პრეზიდენტთან, ბატონ პრემიერ-მინისტრთან. განხილული იქნება სხვადასხვა მნიშვნელოვანი საკითხი როგორც პოლიტიკურ ჭრილში, ასევე სავაჭრო-ეკონომიკური ურთიერთობები. ის საერთაშორისო მნიშვნელობის პროექტები, რომელიც არის დაკავშირებული გზების გაფართოებასთან, ინფრასტრუქტურული პროექტებთან, ბაქო-თბილისი-ყარსის რკინიგზის გაფართოება ერთ-ერთი მნიშვნელოვანი საკითხია. წყალქვეშა კაბელის გაყვანა შავი ზღვის ფსკერზე, ეს და სხვა მნიშვნელოვანი საკითხები იქნება დღის წესრიგში“, – განაცხადა ელჩმა.
საქართველოს პრემიერ-მინისტრი ირაკლი კობახიძე დღეს ოფიციალური ვიზიტით აზერბაიჯანის რესპუბლიკას ეწვევა.