რუსეთის პრეზიდენტმა, ვლადიმერ პუტინმა რუსეთის ციხეში გარდაცვლილ ოპოზიციონერზე, ალექსეი ნავალნიზე პირველად ისაუბრა და მისი გვარიც კი ახსენა.
საარჩევნო შტაბში NBC-ის ჟურნალისტმა, კიერ სიმონსმა კრემლის ლიდერს ჰკითხა, “ევან გერშკოვიჩმა ეს არჩევნები ციხეში გაატარა; ბორის ნადეჟდინს, რომელიც უკრაინაში თქვენი ომის წინააღმდეგია, თქვენთან კონკურენციის უფლებაც არ მისცეს; ალექსეი ნავალნი თქვენი კამპანიის დროს, თქვენივე ერთ-ერთ ციხეში გარდაიცვალა. ბატონო პრეზიდენტო, თქვენ ამას დემოკრატიას უწოდებთ?”.
“ეს ცხოვრებაა. ნადეჟდინის დაუშვებლობა დაკავშირებულია მისი შტაბის არადამაკმაყოფილებელ მუშაობას. რაც შეეხება ბატონ ნავალნის. დიახ, ის გარდაიცვალა. ეს ყოველთვის სამწუხარო ამბავია. გვქონდა სხვა შემთხვევებიც, როცა ადამიანები კვდებოდნენ. და აშშ-ში რა, არ მომხდარა? ეს არაერთხელ მომხდარა. შეგიძლიათ დამიჯეროთ, ან არა, მაგრამ ადამიანს, ვინც მე მესაუბრებოდა, ფრაზა არ ჰქონდა დასრულებული, რომ ვთქვი:”თანახმა ვარ”, – თქვა პუტინმა ნავალნის გაცვლაზე.
როგორც მან აღნიშნა, მის გაცვლას ერთი პირობით დათანხმდა, რომ ამის შემდეგ ნავალნი რუსეთში არ დაბრუნებულიყო.
ალექსეი ნავალნი რუსეთის ციხეში 16 თებერვალს გარდაიცვალა. რამდენიმე დღეში უცხოურ მედიაში გავრცელდა ინფორმაცია, რომ იგეგმებოდა მისი გაცვლა ზელიმხან ხანგოშვილის მკვლელზე – კრასიკოვზე.