ლატვიის პარლამენტის საქართველოს პარლამენტთან თანამშრომლობის ჯგუფის წევრები საკანონმდებლო ორგანოში შეხვედრებს მართავენ.
დელეგაციის წევრებს შეხვდნენ ვიცე-სპიკერი ნინი წილოსანი, ასევე საქართველო-ლატვიის საპარლამენტო მეგობრობის ჯგუფის ხელმძღვანელი ბექა ოდიშარია.
„კარგად მოგეხსენებათ, თუ რა მნიშვნელოვანია ლატვია-საქართველოს მეგობრობა, განსაკუთრებით საქართველოს ევროატლანტიკური მისწრაფებების ჭრილში. ლატვია ყოველთვის იყო ჩვენი მყარი პარტნიორი, მეგობარი და ლობისტი ევროპულ სივრცეში. შესაბამისად, ახლა დისკუსიები გაიმართება სწორედ ამ პრიზმაში. ჩვენ ვიმედოვნებთ, ისევე როგორც უკანასკნელი ორი ათეული წლის განმავლობაში ლატვია ძალიან აქტიურად იყო ჩართული ამ პროცესში, ახლაც განაგრძობს მყარად საქართველოს მხარდაჭერას“, – აღნიშნა შეხვედრის შემდეგ ჟურნალისტებთან საპარლამენტო უმრავლესობის წევრმა, დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ.