საქართველოს, მოლდოვისა და უკრაინის ტერიტორიული მთლიანობის, ევროკავშირში გაწევრიანების პერსპექტივის მხარდაჭერა, მოწოდება რუსეთისადმი, გაიყვანოს სამხედრო ძალები საქართველოს ოკუპირებული ტერიტორიიდან, უკრაინაში სამხედრო მოქმედებების დაუყოვნებლივ შეწყვეტა, – ამ საკითხებს მოიცავს რეზოლუცია, რომლის ინიცირებაც ქართველი ოპოზიციონერებისა და უკრაინის დელეგაციის უარის გამო, „ევრონესტის“ საპარლამენტო ასამბლეაზე ვერ მოხერხდა.
კერძოდ, რეზოლუციის პროექტში სახელწოდებით „საქართველოს, მოლდოვას რესპუბლიკისა და უკრაინის გზის მხარდაჭერის შესახებ ევროკავშირის წევრობისკენ“ ნათქვამია:
– ითვალისწინებს 2023 წლის 14 დეკემბრის ევროპული საბჭოს დასკვნებს უკრაინასა და მოლდოვის რესპუბლიკასთან გაწევრიანების მოლაპარაკებების გახსნისა და საქართველოსთვის კანდიდატის სტატუსის მინიჭების შესახებ.
– ითვალისწინებს 2023 წლის 12 დეკემბრის საერთო საკითხთა საბჭოს დასკვნებს, სადაც ხაზგასმულია, რომ გაფართოება არის გეოსტრატეგიული ინვესტიცია მშვიდობის, უსაფრთხოების, სტაბილურობისა და კეთილდღეობისთვის, რაც კიდევ ერთხელ დადასტურდა ევროპის საბჭოს ზემოაღნიშნულ დასკვნებში;
– მიესალმება საბჭოს სრულ და ცალსახა ვალდებულებას დასავლეთ ბალკანეთის, უკრაინის, მოლდოვისა და საქართველოს ევროკავშირში გაწევრიანების პერსპექტივისადმი, როგორც ეს დასტურდება მის ზემოხსენებულ დასკვნებში, კიდევ ერთხელ ადასტურებს, რომ მათი მომავალი ევროკავშირის ფარგლებშია;
– აღნიშნავს საქართველოს, მოლდოვის რესპუბლიკისა და უკრაინის მტკიცე ერთგულებას ევროკავშირში გაწევრიანების მიზნებისადმი და გადაწყვეტილების მიღების მიზნით, გამოიყენონ ყველა საშუალება ამ მიზნების მისაღწევად;
– ითვალისწინებს აღმოსავლეთ პარტნიორობის კანდიდატი ქვეყნების წინაშე მდგარ გამოწვევებს რუსეთის მხრიდან აგრესიის, ოკუპაციისა და ჰიბრიდული საფრთხეების ფონზე, რომლებიც მიზნად ისახავს მათი გავლენის სფეროში შენარჩუნებას და მათი ევროკავშირში ინტეგრაციის პროცესის შეფერხებას;
– ხაზს უსვამს ევროკავშირის მუდმივი მხარდაჭერის მნიშვნელობას აღმოსავლეთ პარტნიორობის კანდიდატი ქვეყნებისთვის ევროკავშირში გაწევრიანების გზაზე რეფორმების მცდელობებში;
– ხაზს უსვამს, რომ ევროკავშირის გაფართოების პოლიტიკას აქვს ტრანსფორმაციული ძალა და მნიშვნელოვან როლს ასრულებს, როგორც სტრატეგიული ინვესტიცია ევროპაში მშვიდობის, დემოკრატიის, კეთილდღეობის, უსაფრთხოებისა და სტაბილურობისთვის;
„ევრონესტის“ საპარლამენტო ასამბლეის სესია ხაზს უსვამს, რომ დღეს ევროკავშირი და აღმოსავლეთ პარტნიორობის ქვეყნები აღმოჩნდებიან ევროპის უსაფრთხოების არქიტექტურისა და საერთაშორისო წესებზე დაფუძნებული წესრიგის კრიტიკულ ეტაპზე; იმეორებს თავის ღრმა შეშფოთებას უკრაინის წინააღმდეგ რუსეთის მიმდინარე სრულმასშტაბიანი სამხედრო აგრესიის გამო და კიდევ ერთხელ ადასტურებს თავის ურყევ სოლიდარობას უკრაინის მიმართ; იმეორებს თავის ღრმა შეშფოთებას რუსეთის მიერ საქართველოს განუყოფელი რეგიონების აფხაზეთისა და ცხინვალის რეგიონის/სამხრეთ ოსეთის ოკუპაციასთან და მის გაძლიერებულ ანექსიასთან დაკავშირებით, რაც ერთად წარმოადგენს ევროპაში სუვერენული სახელმწიფოს საზღვრების ძალდატანებით შეცვლის მკაფიო მცდელობას; იმეორებს ევროკავშირის ერთგულებას საქართველოს, მოლდოვის რესპუბლიკისა და უკრაინის სუვერენიტეტისა და ტერიტორიული მთლიანობისადმი, მათ საერთაშორისოდ აღიარებულ საზღვრებში და მხარს უჭერს მათ ძალისხმევას ამ პრინციპების სრულად განსახორციელებლად; მოუწოდებს საერთაშორისო თანამეგობრობას გააძლიეროს საქართველოს, მოლდოვის რესპუბლიკისა და უკრაინის სუვერენიტეტისა და ტერიტორიული მთლიანობის პატივისცემა, შეაჩეროს რუსული აგრესია და დაიცვას ევროპის უსაფრთხოება;
მოითხოვს, რომ რუსეთმა დაუყოვნებლივ შეწყვიტოს ყველა სამხედრო მოქმედება უკრაინაში, უპირობოდ გაიყვანოს ყველა ძალა, მარიონეტები და სამხედრო ტექნიკა უკრაინის საერთაშორისოდ აღიარებული ტერიტორიიდან, ასევე თავი შეიკავოს შემდგომი მუქარისგან ან მისი დამოუკიდებლობის, სუვერენიტეტისა და ტერიტორიული მთლიანობის დარღვევისგან.
მიმართავს ევროკავშირის ინსტიტუტებს და წევრ ქვეყნებს, გადადგან მნიშვნელოვანი ნაბიჯები, რათა უზრუნველყონ, რომ რუსეთმა შეასრულოს თავისი ვალდებულებები ევროკავშირის შუამავლობით მიღწეული 2008 წლის 12 აგვისტოს ცეცხლის შეწყვეტის შესახებ შეთანხმების გათვალისწინებით. კერძოდ, გაიყვანოს თავისი სამხედრო და უსაფრთხოების ძალები საქართველოს ტერიტორიიდან და ევროკავშირის სადამკვირვებლო მისიას მიეცეს რუსეთის მიერ ოკუპირებულ საქართველოს რეგიონებში შეუფერხებელი შესვლის უფლება მისი მანდატის შესაბამისად; მოუწოდებს ევროკავშირის ინსტიტუტებს და წევრ ქვეყნებს ადამიანის უფლებათა ევროპული სასამართლოს მიერ მიღებული გადაწყვეტილების და სისხლის სამართლის საერთაშორისო სასამართლოს გამოძიების შესაბამისად, გამოიყენონ ტერმინი „ოკუპაცია“ საქართველოს რეგიონების აფხაზეთისა და ცხინვალის რეგიონის მიმართ, რომლებიც უკანონოდ არის ოკუპირებული რუსეთის მიერ და ექვემდებარებიან კონტროლს.
აღიარებს აღმოსავლეთ პარტნიორობის კანდიდატი ქვეყნების ერთგულებას მათი ევროპული მომავლის მიმართ და მათ წვლილს რეგიონში სტაბილურობასა და უსაფრთხოებაში. მიესალმება საქართველოს, მოლდოვას რესპუბლიკისა და უკრაინის ძალისხმევას რეფორმების განხორციელების, დემოკრატიის, კანონის უზენაესობის, ადამიანის უფლებებისა და ეკონომიკური განვითარების განმტკიცებაში. მოუწოდებს მათ, გააძლიერონ რეფორმების გზა 2023 წლის 8 ნოემბრის გაფართოების პოლიტიკის შესახებ ევროკომისიის განცხადებაში გაწერილი რეკომენდაციების შესაბამისად. მიესალმება კომისიის წინადადებების დასასრულამდე მიყვანას უკრაინასა და მოლდოვის რესპუბლიკასთან მოლაპარაკებების ჩარჩო პროექტის შესახებ, რომელიც ექვემდებარება საბჭოს დამტკიცებას და მოუწოდებს მუშაობას საქართველოსთან გაწევრიანების მოლაპარაკებების დასაწყებად, დამსახურებაზე დაფუძნებული მიდგომის შესაბამისად. იმეორებს, რომ ფასეულობების პატივისცემა, რომელზეც ევროკავშირია დაფუძნებული, ასევე მათი ხელშეწყობა და ევროკავშირის წევრობისთვის საჭირო ვალდებულებების შესრულება აუცილებელია ყველა პარტნიორისთვის, ვინც ევროკავშირში გაწევრიანებისკენ ისწრაფვის.
მოუწოდებს ევროკავშირის კანდიდატი ქვეყნების შეუფერხებლად და დროულ გადასვლას აღმოსავლეთ პარტნიორობიდან გაწევრიანების წინა ინსტრუმენტზე და საჭირო თანხების უზრუნველყოფას, რათა დაეხმაროს მათ ევროკავშირის სტანდარტების დაცვაში და ევროკავშირში წევრობის კრიტერიუმების დაკმაყოფილებაში.
მიესალმება მორგებული საგზაო რუკების შემუშავებას უკრაინისა და მოლდოვის ეტაპობრივი გაწევრიანებისთვის ევროკავშირის ერთიან ბაზარზე, ასოცირების შეთანხმებებისა და ღრმა და ყოვლისმომცველი თავისუფალი სავაჭრო სივრცის გაძლიერებული განხორციელების საფუძველზე. ასევე მიესალმება პროგრესს საქართველოსთან მსგავსი სამოქმედო გეგმის შესათანხმებლად. მოუწოდებს წევრ სახელმწიფოებს, ახალი იმპულსი მისცენ გაფართოების პროცესს და შეასრულონ თავიანთი დაპირებები გაწევრიანების ფაზაში კონკრეტული პოზიტიური ნაბიჯებით იმ ქვეყნების, რომლებიც ცდილობენ გაწევრიანდნენ კავშირში და იმუშაონ ამ მიზნის მისაღწევად.ხაზს უსვამს „ევრონესტის“ საპარლამენტო ასამბლეასა და საქართველოს, მოლდოვას რესპუბლიკის და უკრაინის პარლამენტებს შორის თანამშრომლობის გაგრძელების მნიშვნელობას ევროკავშირში გაწევრიანების მიზნების მხარდასაჭერად.
შეგახსენებთ, ოპოზიციიდან საქართველოს დელეგაციაში შედიოდნენ: გიორგი ვაშაძე, გიორგი ბოტკოველი, ანა წითლიძე და თამარ კორძაია. მმართველ გუნდში აცხადებენ, რომ საკითხის ინიცირებისთვის ოპოზიციიდან ორი დეპუტატის ხელმოწერაც კი საკმარისი იქნებოდა.