ვოლოდიმირ ზელენსკის პარტიის „ხალხის მსახურის“ რამდენიმე ათეულ დეპუტატს მანდატის დატოვება სურს. ამის შესახებ პარტიაში საკუთარ წყაროებზე დაყრდნობით გამოცემა Українська правда წერს. ამ გადაწყვეტილების მიზეზად დეპუტატები „მოტივაციის არარსებობას“ ასახელებენ.
ამჟამად „ხალხის მსახურს“ რადაში 235 დეპუტატი ჰყავს, სხდომებს რეგულარულად კი დაახლოებით 170-180 მათგანი ესწრება.
„პრეზიდენტის ოფისსა და პარლამენტს შორის გაუგებრობა შეიქმნა. პრეზიდენტის ოფისს პარლამენტი სძულს. ისინი ფიქრობენ, რომ ზელენსკის პარტიის წევრები ყველაფერს დაუჭერენ მხარს, იმიტომ რომ ხელისუფლებაში ისინი ზელენსკიმ მოიყვანა. დიახ, მოიყვანა, მაგრამ რა? უკვე ორი წელია, სრულმასშტაბიან ომს ვუძლებთ. ამიტომ ურთიერთობის ძველი მოდელი აღარ მუშაობს. რაღაც უნდა შეიცვალოს“, – ამბობს Українська правда-ს წყარო.
მისივე თქმით, „ყველა დაიღალა ომისგან“, პარალელურად, „გაჩნდა არაერთი შეზღუდვა, მაგალითად, ის, რომ დეპუტატები მივლინებაში ვეღარ მიდიან“.
„დეპუტატები ქვეყანაში მიმდინარე პროცესებზე არანაირ გავლენას არ ახდენენ და ამიტომ ვერ ხედავენ აზრს რადაში დარჩენაში“, – აღნიშნავს Українська правда-ს წყარო.
მისივე ინფორმაციით, მანდატის დატოვების სურვილი ერთბაშად რამდენიმე ათეულმა დეპუტატმა გამოთქვა.
„პირობითად, მოდის დეპუტატი და ამბობს – გამათავისუფლეთ, ქარხანაში მენეჯერის პოზიციაზე მიწვევენ და 8000 დოლარს მთავაზობენ, ოჯახი მყავს სარჩენი. ასეთი ტიპის საუბრები პარტიაში უკვე არაერთხელ მაქვს მოსმენილი“, – ამბობს გამოცემის წყარო.