ქიბარ ხალვაში “რუსთავი 2”-ის გენერალურ დირექტორს პასუხობს და აცხადებს, რომ არანაირი მოლაპარაკება და შეთავაზება არ განიხილება.
ქიბარ ხალვაშმა ამის შესახებ “გურია ნიუსთან” საუბარში განაცხადა.
“გვარამია არ არის გვარამია. ის არის მიშა, როცა გულუბრყვილო ვიყავი, ვცდილობდი პრობლემების დროს მოლაპარაკებას. ეს დრო წავიდა. ეს რომ შესაძლებელი ყოფილიყო მე თვითონ შევთავაზებდი მოლაპარაკებას” ,-აღნიშნა ჩვენთან საუბრისას ქიბარ ხალვაშმა.
მისივე თქმით “არც გვარამიაა მოლაპარაკებების მეტრი”.
“ვიცით, რომ მილიონები მისთვის minor issue არის ამხელა საქმისთვის. მაგათ, ალბათ დაავიწყდათ რა ზარალი მოგვაყენეს მიშამ, გვარამიამ და მათმა თანაგუნდელებმა. დაავიწყდათ, ალბათ, რა გვიქნეს ჩვენ და ჩვენს ახლობლებს“,- განაცხადა ხალვაშმა.
ნიკა გვარამია მზად არის ბიზნესმენ ქიბარ ხალვაშს, რომელიც უზენაესი სასამართლოს გადაწყვეტილებით “რუსთავის 2” -ის მფლობელი გახდა, გადაუხადოს ის თანხა, რაზეც ხალვაში სასამართლოში დაობდა.
როგორც გვარამიამ ბრიფინგზე განაცხადა, მზად არის შეისყიდოს “რუსთავი 2” წილების 100%.
უზენასმა სასამართლომ “რუსთავი 2”-ის საქმეზე გადაწყვეტილება მიიღო. უზენაესი სასამართლოს გადაწყვეტილებაში წერია, რომ ლევან ყარამანაშვილის, გიორგი ყარამანაშვილის, შპს ტელეკომპანია საქართველოს, ნინო ნიჟარაძის, შპს ჰაიდელბერგცემენტ ჯორჯიას საკასაციო საჩივრები დაკმაყოფილდეს ნაწილობრივ.
გაუქმდეს თბილისის სააპელაციო სასამართლოს სამოქალაქო საქმეთა პალატის 2016 წლის 10 ივნისის განჩინება და მიღებულ იქნეს ახალი გადაწყვეტილება.
ქიბარ ხალვაშისა და შპს პანორამა-ს სარჩელი დაკმაყოფილდეს ნაწილობრივ.
გაუქმდეს შპს სამაუწყებლო კომპანია “რუსთავი 2”-ის პარტნიორების: ლევან ყარამანიშვილის 22%-ის, გიორგი ყარამანიშვილის 18%-ის, შპს “ტელეკომპანია საქართველოს” 51%-ის და ნინო ნიჟარაძის 9%-ის წილების რეგისტრაცია საჯარო რეესტრში და შპს სამაუწყებლო კომპანია რუსთავი 2-ის 60% წილის მესაკუთრედ ცნობილი იქნებ ქიბარ ხალვაში და 40%-ის წილის მესაკუთრედ ცნობილი იქნეს შპს “პანორამა”.
უცვლელად დარჩეს წინამდებარე გადაწყვეტილების შესავალ ნაწილში მითითებული სააპელაციო სასამართლოს სამოქალაქო საქმეთა პალატის გასაჩივრებული განჩინების წინმსწრები განჩინებები, მოპასუხეებს შპს ტელეკომპანია საქართველოს, გიორგი ყარამანიშვილს, ლევან ყარამანიშვილს და ნინო ნიჟარაძეს, ქიბარ ხალვაშსა და შპს პანორამას სასარგებლოდ, სოლიდარულად, დაეკისრათ სახელმწიფო ბაჟის სახით 5000 ლარის ანაზღაურება.
საქართველოს უზენაესი სასამართლოს დიდი პალატის გადაწყვეტილება საბოლოოა და არ საჩივრდება.