საპარლამენტო უმრავლესობის წევრებმა 1989 წლის 9 აპრილს დაღუპულთა მემორიალი ტიტებით შეამკეს და მათ ხსოვნას პატივი მიაგეს.
პარლამენტის წევრებთან ერთად, 9 აპრილის მემორიალთან, პრემიერ-მინისტრი ირაკლი კობახიძე, მინისტრთა კაბინეტის წევრები და თბილისის მერი კახა კალაძე იმყოფებოდნენ.
საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა, შიომ (მუჯირი) 9 აპრილს გარდაცვლილთა სულის მოსახსენიებელი პანაშვიდი გადაიხადა.
საპარლამენტო უმრავლესობის ლიდერის, ფრაქცია „ქართული ოცნების“ თავმჯდომარის, მამუკა მდინარაძის განცხადებით, 9 აპრილი არის გმირობის ის მაგალითი, რომელზეც მომავალი თაობები უნდა გაიზარდონ.
„ეს არის დღე, რომელიც ერთდროულად ასოცირდება დიდ ტკივილთან, რომელიც თავისუფლებისა და დამოუკიდებლობისთვის მებრძოლი ადამიანების დაღუპვას სდევდა. მეორე მხრივ, ორი წლის შემდეგ, ზვიად გამსახურდიას ხელმძღვანელობით, სიმბოლიზმმა, რომელიც საუკუნეების განმავლობაში გაჰყვება 9 აპრილს, დიდი სიხარული შესძინა ამ თარიღს.
ამავდროულად, 9 აპრილი არის გმირობის ის მაგალითი, რომელზეც ჩვენი შვილები უნდა გაიზარდონ. დამოუკიდებლობა და თავისუფლება ეს არის მთავარი ღირებულება, რისთვისაც ქართველები საუკუნეების განმავლობაში იბრძოდნენ და ეს არის ჩვენი გენეტიკური კოდი. ქართველი, საქართველო და ქართული საზოგადოება არ დათმობს არც თავისუფლებას, არც დამოუკიდებლობას და ნებისმიერ ფასად შეძლებს, რომ იყოს თავისუფალი, დამოუკიდებელი “, – აღნიშნა მამუკა მდინარაძემ.
9 აპრილის ტრაგედიიდან 35 წელი გავიდა. 1989 წლის 9 აპრილს, გამთენიისას საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც მსხვერპლი მოჰყვა.
დარბევის შედეგად 21 ადამიანი დაიღუპა, ხოლო ასობით მოქალაქე დაუდგენელი შემადგენლობის გაზით მოიწამლა.
მოგვიანებით, 1991 წლის 9 აპრილს კი უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.