თბილისის საკრებულოს თავმჯდომარე გიორგი ტყემალაძე „დღის ქრონიკაში“ საჯარო მოხელეების მისამართით სოციალურ ქსელებში და ოპოზიციის წარმომადგენლების მხრიდან განხორციელებულ ბულინგის კამპანიას გამოეხმაურა.
წამყვანმა მას ჰკითხა, რას უპასუხებს ოპოზიციას, რომელიც ამბობს, რომ საჯარო მოხელეების დაშინება მიდის, რომ 29 აპრილს შეკრებაზე მივიდნენ.
„ეს [განცხადებები] კიდევ ერთხელ ადასტურებს, რომ მათ [ოპოზიციამ] ზუსტად იციან, რომ „ქართულ ოცნებას“ აქვს ძალიან დიდი მხარდაჭერა ქართველი ხალხის და მათ შორის საჯარო მოხელეების. ეს არის შეურაცხყოფა საჯარო მოხელეების. ოპოზიცია მათ აყენებს შეურაცხყოფას, აღარ დავკონკრეტდები რა სიტყვებით. ეს გამიზნულია ერთადერთი რამისთვის, ოპოზიციამ კარგად იცის, რომ საქართველოს ბევრი მოქალაქე იქნება 29 აპრილს პარლამენტის წინ იმისათვის, რომ დაიცვან თავისი ქვეყანა, ტრადიციები, ღირებულებები. მიზანმიმართული პროპაგანდაა, ამ ადამიანების ბულინგი, რომ თითქოსდა იქ [შეკრებაზე] გასვლა არის რაღაც მატერიალურთან, ან დაშინებასთან დაკავშირებული. მე თვითონ წარმოვადგენ ორგანიზაციას, სადაც არაერთი ადამიანია საჯარო მოხელე, ასეულობით ადამიანი და სრული პასუხისმგებლობით მინდა განვაცხადო, რომ ვერცერთ საჯარო მოხელეს, დაშვებითაც კი ვერ გავიაზრებთ, რომ შეიძლება ვინმემ უთხრას, დააძალოს, რომ ვინმეს ანგარიშგასაწევად მივიდეს რომელიმე შეხვედრაზე, აქციაზე თუ ა.შ“, – აღნიშნა ტყემალაძემ.