დღევანდელი შეხვედრის ძირითადი მოტივია „ხიდი მომავლისკენ“, რაც საუკეთესოდ ასახავს საქართველოს კურსს – ჩვენი გადაწყვეტილებებით და ნაბიჯით ვქმნით უფრო განვითარებულ, ეკონომიკურად ძლიერ, უსაფრთხო და დაცულ მომავალს შემდგომი თაობებისთვის, – ამის შესახებ საქართველოს პრემიერ-მინისტრმა ირაკლი კობახიძემ აზიის განვითარების ბანკის (ADB) 57-ე წლიური შეხვედრის ოფიციალური გახსნის ცერემონიაზე სიტყვით გამოსვლისას განაცხადა.
მთავრობის მეთაურმა აღნიშნა, რომ ამ ხედვას აძლიერებს საქართველოს სტრატეგიული გეოგრაფიული მდებარეობა, რომელიც ქვეყანას ევროპასა და აზიას შორის დამაკავშირებელ ხიდად აქცევს.
„ჩვენი უნიკალური მდებარეობა გვაძლევს საშუალებას, ერთდროულად ვიყოთ ევროპის ნაწილი და ამავე დროს ღირსეულად ვატარებდეთ ისტორიული აბრეშუმის გზის ერთ-ერთი მემკვიდრის სტატუსს. ჩვენი სტრატეგიული სატრანსპორტო დერეფნებით უმნიშვნელოვანეს როლს ვასრულებთ ე.წ. შუა დერეფნის ფუნქციონირებაში, რომელიც სხვა მარშრუტების სტაბილურ, უსაფრთხო და საიმედო ალტერნატივად ჩამოყალიბდა. ჩვენ გავაგრძელებთ აზიური ბიზნესისა და ინვესტორებისთვის საუკეთესო ბიზნესგარემოს შეთავაზებას და რეგიონში მათი გაფართოების შესაძლებლობის უზრუნველყოფას“, – განაცხადა პრემიერ-მინისტრმა და აზიის განვითარების ბანკს საქართველოს აქტიური მხარდაჭერისა და მრავალწლიანი წარმატებული თანამშრომლობისთვის მადლობა გადაუხადა.
ოფიციალური გახსნის ცერემონიის სტუმრებს სიტყვით მიმართეს საქართველოს ფინანსთა მინისტრმა ლაშა ხუციშვილმა და აზიის განვითარების ბანკის პრეზიდენტმა მასაცუგუ ასაკავამ.
აზიის განვითარების ბანკის 57-ე ყოველწლიურ შეხვედრაში 68 ქვეყნის 4000-მდე სტუმარი მონაწილეობს, მათ შორის, აზიის განვითარების ბანკის ვიცე-პრეზიდენტები, ბანკის აღმასრულებელი დირექტორები, საერთაშორისო ფინანსური ინსტიტუტებისა და კერძო სექტორის წარმომადგენლები.
