რუსმა ჰაკერებმა სატელიტური არხები, „სტარლაით მედია“ და „ინტერ თივი“ გატეხეს და მოსკოვის წითელ მოედანზე მიმდინარე აღლუმის ტრანსლირება დაიწყეს, რომელიც დღეს, 9 მაისს, „გამარჯვების დღის“ აღსანიშნავად ჩატარდა.
ამის შესახებ „დეტექტორ მედია“, ტელეგრამ-არხების შესაბამის პოსტებზე დაყრდნობით იუწყება.
აღნიშნული ინფორმაცია უკრაინის ტელევიზიისა და რადიო-მაუწყებლობის ეროვნულმა საბჭომაც დაადასტურა.
მომხდარიდან გამომდინარე, უკრაინელი პროვაიდერები IP TV სიგნალებზე გადადიან. ამჟამად სპეციალისტები ჰაკერული თავდასხმის მოსაგერიებლად მუშაობენ.
9 მაისს, მოსკოვის წითელ მოედანზე, „გამარჯვების დღისადმი“ მიძღვნილი სამხედრო აღლუმი გაიმართა. რუსული მედიის ცნობით, ღონისძიებას ესწრებოდა რუსეთის რამდენიმე სამხედრო მაღალჩინოსანი, ასევე ბელარუსის ლიდერი, ალექსანდრე ლუკაშენკო, ყაზახეთის, ყირგიზეთის, ტაჯიკეთის, თურქმენეთის, უზბეკეთის, კუბის, ლაოსისა და გვინეა-ბისაუს პრეზიდენტებთან ერთად. აღლუმში სულ 9 000-ზე მეტი პირი, 75 ერთეული სამხედრო ტექნიკა და თვითმფრინავი მონაწილეობდა.
გასულ წელს, რუსეთმა 9 მაისის ტრადიციული აღლუმები, სულ მცირე, 21 ქალაქში გააუქმა. იმის შიშით, რომ ღონისძიება ხაზს გაუსვამდა ომში რუსული ჯარების დანაკარგებს, რუსეთის ხელმძღვანელობამ გასულ წელს ასევე გადაწყვიტა, გაეუქმებინა „უკვდავი პოლკის“ საზეიმო მსვლელობა, რომელიც რუსეთში, ტრადიციულად, მეორე მსოფლიო ომის დაწყების წლისთავზე იმართება ხოლმე. ბრიტანული დაზვერვის თანახმად, წელს აღლუმები გაუქმდა ბრიანკის, ფსკოვის, ბელგოროდის, რიაზანისა და კურსკის რეგიონებში. რუსეთში წელს არც „უკვდავი პოლკის“ მსვლელობა ჩატარებულა.