გერმანიის 80-ზე მეტ ქალაქში საპროტესტო აქციები გაიმართა. ინფორმაციას DW ავრცელებს.
მედიის ცნობით, ათასობით ახალგაზრდა ქალაქების ქუჩებში განათლებაში ინვესტიციებისა და კლიმატის დაცვის მოთხოვნებით გამოვიდა. მომიტინგეები აგრეთვე გერმანიაში სავალდებულო სამხედრო სამსახურის სისტემის დანერგვის წინააღმდეგ გამოვიდნენ.
ყველაზე მასშტაბური აქცია ბერლინში გაიმართა. ბერლინის პოლიციის განცხადებით, მსვლელობა მოძრაობა Gen Z regelt-მა მოაწყო. მასში დაახლოებით 4 ათასმა ადამიანმა მიიღო მონაწილეობა, თუმცა ორგანიზატორები ამბობენ, რომ მიტინგზე 10 ათასიდან 15 ათასამდე ადამიანი მოვიდა.
მსვლელობის მონაწილეებს, რომელთა რიგებში სკოლის მოსწავლეები და სტუდენტები იყვნენ, ხელში ეკავათ პლაკატები წარწერით „რეაგირება და არა იგნორირება“, „სკოლა ცოდნას უნდა აძლევდეს და არა დატვირთვას“. მსვლელობაში აგრეთვე მონაწილეობდნენ მემარცხენე და კომუნისტური პარტიების წარმომადგენლები და პროპალესტინური ჯგუფები.
