„ხალხის ძალის“ გენერალური მდივანი დიმიტრი ხუნდაძე სოციალურ ქსელში ეხმიანება ოჯახის სიწმინდის დღეს. იგი სრულიად საქართველოს ულოცავს დღევანდელ დღეს და აცხადებს, რომ დღეს ფასეულობათა ომია და მთავარი დარტყმა სწორედ ოჯახურ ღირებულებებზე მოდის, რადგან ძლიერი ოჯახი ძლიერი სახელმწიფოს საფუძველია.
„დღეს სრულიად საქართველო ოჯახის სიწმინდის დღეს აღნიშნავს.
გილოცავთ!
ეს არის დღე, რომელიც აერთიანებს ჩვენს ქვეყანას უმთავრესი ღირებულების ირგვლივ. სახელმწიფოს შემეცნება და აღქმა უძველესი დროიდან ქართველებში ოჯახური კულტურით ყალიბდება. ეს არის ის საძირკველი, რაზედაც დაშენებულია რწმენისა და ეროვნული ფასეულობების ერთობლიობა.
სწორედ ამ ფასეულობებს გვართმევენ დღეს. სწორედ ამის განადგურება სურთ, რადგან იციან, რომ “ძლიერი ოჯახი ძლიერი სახელმწიფოა”, ძლიერი სახელმწიფოს წაქცევა კი შეუძლებელი!
დღევანდელ დღეს ვზეიმობთ და ამასთანავე გვტკივა ის რეალობა, რაც ჩვენს თვალწინ ხდება. მსოფლიოში გამეფებულმა ფსევდოლიბერალიზმმა ყველა ჯებირი გაანგრია და მთელი სისასტიკით, რომელსაც ეკლესია გარყვნილებას უწოდებს, უტევს დღევანდელობას.
ამ მიზანმიმართულად შექმნილ იდეოლოგიას სურს წაგვართვას ჩვენთვის ყველაზე ძვირფასი სიტყვები: – დედა, მამა, ძმა, და… სურს ოჯახი მხოლოდ ფიზიკურ ფართად აქციოს და არა იმ სულიერ განძად, რაც ჩვენი ისტორიის, ჩვენი იდენტობის სახეა.
დღეს ღირებულებათა ომია და ეს ომი ბევრად უფრო სასტიკია, ვიდრე სხვა. მისი სამიზნე სწორედ ოჯახია. მძიმეა ეს ბრძოლა, მაგრამ გვჯერა, რომ ამ ბრძოლაში აუცილებლად გავიმარჯვებთ.
არ არსებობს იმაზე დიდი სიწმინდე, ვიდრე საკუთარი ოჯახია, და არ არსებობს იმაზე ღირსეული ბრძოლა, ვიდრე ოჯახური ღირებულებების დაცვაა.
კიდევ ერთხელ გილოცავთ საქართველოს ყველა მოქალაქეს ოჯახის სიწმინდისა და მშობელთა პატივისცემის დღეს!“ – წერს ხუნდაძე.