უკრაინამ და პორტუგალიამ უსაფრთხოების ორმხრივ შეთანხმებას მოაწერეს ხელი. აღნიშნული შეთანხმება ლისაბონში უკრაინის პრეზიდენტ ვოლოდიმირ ზელენსკისა და პორტუგალიის პრემიერ-მინისტრ ლუის მონტენეგროს შორის გაფორმდა.
შეთანხმების თანახმად, პორტუგალია უკრაინას მიმდინარე წელს სულ მცირე 126 მილიონი ევროს ღირებულების სამხედრო დახმარებას გაუწევს.
„უკრაინა და პორტუგალია კოორდინაციას მოახდენენ და განაგრძობენ ერთობლივ ძალისხმევას ჩვენი ქვეყნის მხარდასაჭერად ნატო-ში გაწევრიანების გზაზე“, – აღნიშნულია უკრაინის პრეზიდენტის ოფისის მიერ გავრცელებულ განცხადებაში.
პორტუგალია გახდა მე-12 ქვეყანა, რომელმაც ხელი მოაწერა ორმხრივ უსაფრთხოების შეთანხმებას უკრაინასთან გაერთიანებული სამეფოს, გერმანიის, საფრანგეთის, დანიის, კანადის, იტალიის, ნიდერლანდების, ფინეთის, ლატვიის, ესპანეთისა და ბელგიის შემდეგ.