სტიქიამ იმერეთი დააზარალა – სეტყვამ ბაღდათის, ზესტაფონის, თერჯოლისა და საჩხერის სოფლებში თითქმის სრულად გაანადგურა ნათესები, ხილის ბაღები და ვენახები. დახოცილია შინაური ფრინველი.
“ამერიკაში რომ არის ტორნადო, იმის მსგავსი იყო. ასე ატრიალებდა ყველაფერს, ფოთოლს, ხეს, ტოტს, თვითონ ყინულს. ყველანაირი მოსავლის 100% გაანადგურა. გარდა ამისა, სახლის სახურავიც,“ – აცხადებს დაზარალებული იაგო მერკვილაძე.
დაზიანებულია სახლების სახურავები. სპეციალურად შექმნილმა კომისიამ ზარალის შესწავლა უკვე დაიწყო.
“22 წუთის განმავლობაში მე და ჩემი პატარა შვილი ვიყავით სახლში, არ ვიცოდი რა გამეკეთებინა, სად წავსულიყავი, კარებში რომ ფეხი გამოვდგი ჭერი თავზე ჩამოგვენგრა. სრულიად საცხოვრებლის გარეშე დავრჩით. სახლი, მანქანა, ყველაფერი, რაც გაგვაჩნდა, ქუჩაში ვართ ფაქტობრივად, ერთი საბანი და ბალიში არ გვაქვს, რომ ბავშვი დავაწვინო,“ – აცხადებს ერთ-ერთი დაზარალებული.