ლიეტუველმა მესაზღვრეებმა დააკავეს მოლდოველი მძღოლი, რომელსაც ლატვიიდან პოლონეთში შვიდი სირიელი მიგრანტი გადაჰყავდა.
ლიეტუვას სახელმწიფო სასაზღვრო სამსახურის (VSAT) ინფორმაციით, „მერსედენს-ბენცის“ მარკის ფურგონი, რომელშიც სირიელი მიგრანტები იმალებოდნენ, ქვეყნის დასავლეთ ნაწილში, შაკიაის რაიონში გააჩერეს.
21 ივლისს სასამართლომ მძღოლის ერთი თვით დაკავების სანქცია გასცა.
მიგრანტები კი, დროებით, სახელმწიფო სასაზღვრო სამსახურის ერთ-ერთ დაწესებულებაში განათავსეს.
VSAT-ის მიერ გავრცელებული ინფორმაციით, შაბათ საღამოს, მესაზღვრეებმა, მათთვის მიწოდებული ინფორმაციის გადასამოწმებლად, სოფელ ვალენჩუნაის მახლობლად, ადგილობრივი პოლიციის თანამშრომლების დახმარებით, „მერსედენს-ბენცის“ მარკის ფურგონი გააჩერეს, რომელიც ლიეტუვური სანომრე ნიშნებით გადაადგილდებოდა. მანქანას მოლდოვას 33 წლის მოქალაქე მართავდა.
პოლიციამ მანქანა შეამოწმა და სამშენებლო მასალებით შენიღბულ სამალავში, ექვსი მამაკაცი და ერთი ქალი იპოვა. მათგან ხუთს, რომლებიც 20-დან 25 წლამდე ასაკისანი არიან, სირიაში გაცემული პირადობის მოწმობა ჰქონდა, დანარჩენი ორი კი დოკუმენტაციის გარეშე იყო.
მოლდოვას მოქალაქე ამტკიცებდა, რომ მას ევროკავშირის სამთვიანი სამუშაო ვიზა გააჩნდა, ლიეტუვაში რეგისტრირებული ფურგონი კი ლატვიაში მყოფმა პირმა გადასცა. მისივე ჩვენების თანახმად, მიგრანტები მან ლატვიის ტერიტორიაზე აიყვანა და ისინი პოლონეთში უნდა გადაეყვანა.
მოლდოვას მოქალაქეს ჯარიმის გადახდა ან ექვს წლამდე თავისუფლების აღკვეთა ემუქრება.