ადამიანს იმის უფლებასაც კი ართმევენ, გაარკვიოს, ქალია, თუ კაცი. ამ უბედურების საწინააღმდეგოდაც იქნება ეს არჩევნები. ოპოზიციას ყოველთვის ესიზმრება შავი ხვრელები და ზოგადად, რეალობისგან ყოველთვის შორსაა, ის მხოლოდ ოცნებობს და ოცნებას კაცი არ მოუკლავს, – განაცხადა „ქრონიკასთან“ საუბარში პარტია „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა.
დეპუტატი გამოეხმაურა „ქართული ოცნების“ გუშინდელ ღონისძიებას და ლიდერების მიერ გაჟღერებულ გზავნილებს.
„გუშინ იყო ერთ-ერთი პირველი რეგიონული შეხვედრა ქართულ საზოგადოებასთან. ლიდერებმა დააფიქსირეს პოზიცია, რა იქნება ძირითადი სამიზნე და გენერალური ხაზი ჩვენი წინასაარჩევნო კამპანიის. ეს იქნება მშვიდობის და სუვერენიტეტის შენარჩუნება და რა თქმა უნდა ტრადიციების შენარჩუნება. ეს არის ყველაზე მნიშვნელოვანი გზავნილები, რაც იქნება წინასაარჩევნო კამპანიის დროს. ეს რომ არის რეალური და არ არის მოგონილი, იხილეთ სენატორების, კონგრესმენების, ევროპარლამენტარების გამოსვლები, რომლებიც პირდაპირ გვეუბნებიან, რომ კონსტიტუციაში დააკანონეთ ერთნაირსქესიანთა ქორწინება, ამოიღეთ ქალის და კაცის ცნებები, ბავშვებს ასწავლეთ, რომ რომ გაიზრდებიან არც ქალი გამოვა და არც კაცი, არამედ იქნება ადამიანიო. ადამიანს იმის უფლებასაც კი ართმევენ, გაარკვიოს, ქალია, თუ კაცი. ეს არის მთელი უბედურება. ამ უბედურების საწინააღმდეგოდაც იქნება ეს არჩევნები და რეფერენდუმი. გასაგებია, რომ ოპოზიციას ყოველთვის ესიზმრება შავი ხვრელები და ზოგადად, რეალობისგან ყოველთვის შორსაა, ის მხოლოდ ოცნებობს და ოცნებას კაცი არ მოუკლავს“, – აღნიშნა მაჭარაშვილმა.
მმართველმა პარტიამ საარჩევნო კამპანიის ფარგლებში, გასვლითი რეგიონული შეხვედრა ამომრჩეველთან მცხეთიდან დაიწყო. „მხოლოდ მშვიდობით, ღირსებით, კეთილდღეობით ევროპისკენ!“ – ეს „ქართული ოცნების“ სლოგანია. სვეტიცხოვლის ტაძრის მიმდებარე ტერიტორიაზე შეკრებილ მოქალაქეებს „ქართული ოცნების“ დამფუძნებლისა და საპატიო თავმჯდომარის გარდა, სიტყვით პრემიერმა და პარტიის ლიდერებმაც მიმართეს.