მწერლის, მხატვრის, მსახიობის, ლექტორის გაფიცვა ჩემთვის აბსოლუტურად მიუღებელი და გაუგებარია, – განაცხადა გადაცემაში „იმედი LIVE“ ბათუმის თეატრის სამხატვრო ხელმძღვანელმა ნუკრი ქანთარიამ.
მანვე აღნიშნა, რომ ბათუმის თეატრმაც შეაჩერა სპექტაკლები, რადგანაც ობსტრუქციისა და პროვოკაციის საფრთხე არსებობდა.
„დღეს ვის ეშინია ან რისი, ამდენი ტელევიზიაა, ყველას შეუძლია ერთ კვირაში გახსნას. Facebook-ია და გავსებულია ამ ყველაფრით. ვის რისი ეშინია. უბრალოდ, ჭრელი სიტუაცია შეიქმნა, ნაწილს ალბათ სჯერა. ჩემთვის აბსოლუტურად მიუღებელია მოწოდებები – „გაბედე!“, „გაიფიცე!“. მწერლის, მხატვრის, მსახიობის, ლექტორის გაფიცვა ჩემთვის აბსოლუტურად მიუღებელი და გაუგებარია. თეატრებმა გააჩერეს, მეც გავაჩერე სპექტაკლები იმის გამო, რომ ობსტრუქციისა და პროვოკაციის ერთგვარი საფრთხე იყო. რუსთაველის თეატრი რომ ვერ იმუშავებს, ეს გასაგებია. ნუ გაფიცვაში თუ ჩაითვლება, ჩაითვალოს, ესეც არაა პრობლემა. მაგრამ ის, რომ დღეს ჩვენთან ვინმეს ვინმესი ეშინია და ხმამაღლა ვერ ამბობს რამეს, ეს გამორიცხულია. თუ ვინმეს რამის ეშინოდა, ეშინოდა 2012 წლამდე, როცა იყო თითზე ჩამოსათვლელი ტელევიზიები. მაშინ იყო სწორედ, ხელებს რომ ამტვრევდნენ არა მარტო იმისთვის, რომ რაღაც თქვა. გაფიქრებისაც კი ეშინოდა ადამიანს“,- აღნიშნა ქანთარიამ.