გერმანიის მთავრობის სპიკერმა, შტეფენ ჰებესტრაიტმა განაცხადა, რომ გერმანია ამჟამად არ განიხილავს უკრაინაში სამშვიდობო ძალების გაგზავნას.
მისი თქმით, გერმანია და მისი პარტნიორები განიხილავენ უკრაინაში სამშვიდობო ძალების განლაგებას სამომავლო უსაფრთხოების გარანტიების ფარგლებში მას შემდეგ, რაც დადგება კონკრეტული პირობები, მათ შორის ცეცხლის შეწყვეტა.
„ამ საკითხს უამრავი წინაპირობა აქვს, მათ შორის ყველაზე მნიშვნელოვანია ცეცხლის შეწყვეტის შეთანხმება, რომელიც შეთანხმებული იქნება ორივე მხარის მიერ. […] ამჟამად პუტინი აგრძელებს სასტიკ აგრესიულ ომს უკრაინის წინააღმდეგ“, – განაცხადა შტეფენ ჰებესტრაიტმა.
მან დასძინა, რომ გადაწყვეტილებები ომისშემდგომი სამშვიდობო ძალისხმევის შესახებ საჭიროებს განხილვას უკრაინასა და მის მოკავშირეებს შორის, როგორც კი სიტუაცია დასტაბილურდება.