„ევრონიუსის“ ცნობით, მოსკოვში მოკლეს ცნობილი რუსი ექსპერტი, რომელიც რაკეტების მოდერნიზაციაზე მუშაობდა.
საუბარია მიხაილ შატსკიზე, რომელიც მოსკოვის ოლქში, ტყეში მოკლეს. შატკსი მონაწილეობდა იმ ფრთოსანი რაკეტების განვითარებაში, რომლებსაც რუსეთი უკრაინის წინააღმდეგ ომში იყენებს. ის ასევე მუშაობდა ხელოვნური ინტელექტის ტექნოლოგიის დანერგვაზე რუსულ დრონებში.
„ევრონიუსის“ ინფორმაციით, შატკსის კუზმინცევის ტყეში ესროლეს, რომელიც კრემლიდან 13 კილომეტრში მდებარეობს.
როგორც „ევრონიუსი“ იუწყება, უკრაინული მედიასაშუალებების ნაწილმა გაავრცელა ცნობა, რომ შატსკი უკრაინის თავდაცვის სამინისტროს დაზვერვის სამმართველოს თანამშრომლებმა მოკლეს.
„ევრონიუსი“ წერს, რომ აღნიშნული ინფორმაციის დამოუკიდებლად გადამოწმება მედიასაშუალებამ ვერ შეძლო.
კომენტარები