უკრაინის წინააღმდეგ რუსეთის მიერ წამოწყებულ ომში 83 ათასი რუსი ჯარისკაცის სიკვდილის ფაქტი დადასტურდა. ინფორმაციას ამის შესახებ „ბიბისი“ ავრცელებს.
როგორც „ბიბისის“ რუსულენოვანი სამსახური იუწყება, უკრაინაში მოკლული რუსი ჯარისკაცების რაოდენობა რეალურად შესაძლოა 185 000 იყოს. ეს არ მოიცავს დონბასის მცხოვრებლებს, რომლებიც რუსეთის მხარეს იბრძოდნენ.
ამასთან, ბოლო ორ კვირაში უკრაინაში მოკლული იმ რუსი სამხედროების სიას, რომელთა ამოცნობაც ჟურნალისტებმა შეძლეს, 2 365 ადამიანის სახელი დაემატა.
„ბიბისის“ ცნობით, უკრაინაში ფართომასშტაბიანი ომის დაწყების შემდეგ დადასტურებულია 4 467 რუსი ოფიცრის სიკვდილი, მათ შორის რვა გენერალია. ყველაზე დიდი დანაკარგია რუს მოხალისეებს (22%), მსჯავრდებულებსა (18%) და მობილიზებულ პირებს შორის (12%). მედია წერს, რომ ყველაზე მეტი მოკლული სამხედრო ბაშკირეთის რესპუბლიკიდანაა.