“როდესაც პუტინმა უკრაინაში შეჭრა დაიწყო, ფიქრობდა რომ რამდენიმე დღეში აიღებდა კიევს, მაგრამ ომის დაწყების შემდეგ კიევის ცენტრში მე გამოვჩნდი და არა ის”

აშშ-ის პრეზიდენტმა, ჯო ბაიდენმა განაცხადა, რომ ვლადიმერ პუტინის ომი უკრაინისა და მთლიანად დასავლეთის წინააღმდეგ ჩავარდა.

აშშ-ის პრეზიდენტის თქმით, რუსეთი დასუსტდა, დასავლეთი კი გაძლიერდა.

ბაიდენმა ხაზგასმით აღნიშნა, რომ უკრაინაში შეჭრისას, პუტინი იმედოვნებდა კიევის აღებას „რამდენიმე დღეში“.

„როდესაც პუტინმა უკრაინაში შეჭრა დაიწყო, ფიქრობდა, რომ რამდენიმე დღეში აიღებდა კიევს. მაგრამ რეალურად ომის დაწყების შემდეგ კიევის ცენტრში მე გამოვჩნდი და არა ის. პუტინს ეს არასდროს გაუკეთებია. იფიქრეთ ამაზე! მე გავხდი ერთადერთი უმაღლესი მთავარსარდალი, რომელიც ეწვია საბრძოლო მოქმედებების ზონას, რომელიც არ არის ამერიკული კონტროლის ქვეშ“, – განაცხადა ჯო ბაიდენმა.

„ჩვენ დავეხმარეთ უკრაინას პუტინის შეჩერებაში. ახლა კი, სამი წლის შემდეგ, პუტინმა ვერ მიაღწია ვერცერთ სტრატეგიულ მიზანს. მან ჯერ ვერ შეძლო უკრაინის დამორჩილება. ვერ მოახერხა ნატოს ერთიანობის დანგრევა. და მან ვერ შეძლო დიდი ტერიტორიული შენაძენების მოპოვება. მაგრამ სამუშაო ჯერ არ დასრულებულა“, – დასძინა აშშ-ის პრეზიდენტმა.