უკრაინა ძალიან აფასებს თურქეთთან ურთიერთობას, ურთიერთგაგებას, რომელსაც ვიზიარებთ, და მხარდაჭერას, რომელსაც ვიღებთ ომის დროს, – ამის შესახებ უკრაინის პრეზიდენტმა, ვოლოდიმირ ზელენსკიმ, ანკარაში თურქეთის პრეზიდენტთან, რეჯეფ თაიფ ერდოღანთან შეხვედრის შემდეგ განაცხადა.
„ჩვენ მადლობელი ვართ თბილი დახვედრისთვის, სტუმართმოყვარეობისა და აბსოლუტურად კონსტრუქციული მიდგომისთვის ჩვენს მოლაპარაკებებში“, – აღნიშნა ზელენსკიმ.
უკრაინის პრეზიდენტის თქმით, ერდოღანთან განიხილა „გლობალური პროცესები“, რომლებიც ხელს შეუწყობს რუსეთის ომის დასრულებას უკრაინაში, მათ შორის, ერთობლივი ძალისხმევის მნიშვნელობა კიევის უსაფრთხოების გარანტიების უზრუნველსაყოფად.
„ჩვენ ასევე ვისაუბრეთ ჩვენს ორმხრივ ურთიერთობებზე, ეკონომიკურ საკითხებზე, ჩვენს საზოგადოებებს შორის თანამშრომლობაზე განათლების სფეროში, სხვადასხვა პროექტზე, სასურსათო უსაფრთხოებასა და რუსეთის მიერ პატიმრობაში მყოფი ჩვენი პატიმრების დასაბრუნებლად მუშაობაზე. ჩვენ მადლობელი ვართ თურქეთის ჩვენი ქვეყნისა და ხალხის მხარდაჭერისთვის, ჩვენი სახელმწიფოს სუვერენიტეტისა და ტერიტორიული მთლიანობის მიმართ მათი პრინციპული პოზიციისთვის“, – განაცხადა უკრაინის პრეზიდენტმა.
ამასთან, როგორც „ანადოლუ“ წერს, უკრაინამ და თურქეთმა ხელი მოაწერეს ორ ორმხრივ შეთანხმებას განათლებისა და მედიის თანამშრომლობის შესახებ.