პარტია „ხალხის ძალის“ წევრი დავით ქართველიშვილი სოციალურ ქსელში ეხმიანება ნორვეგიის ნობელის კომიტეტის გადაწყვეტილებას, რომლის თანახმადაც „მშვიდობისა და საერთაშორისო სამართლის განმტკიცებაში შეტანილი ძალისხმევისთვის“ ნობელის მშვიდობის პრემია მიანიჭა 85 წლის სამხრეთაფრიკელ იურისტსა და ადამიანის უფლებათა დამცველს, ნავანეთემ „ნავი“ პილაის.
ექსპერტის თქმით, ნორვეგიულმა კომიტეტმა, როგორც ჩანს, გადაწყვიტა, გამოცადოს არა მხოლოდ ამერიკული დიპლომატია, არამედ თავად ამერიკის პრეზიდენტის მოთმინებაც.
„სადაცაა გაიღვიძებს… როგორც ჩანს, დღეს დილით დონალდ ტრამპს ყავის ორმაგი ესპრესო დასჭირდება. ნობელის პრემია მშვიდობის დარგში ისევ მას კი არა, სამხრეთაფრიკელ, 85 წლის იურისტს მიანიჭეს – თანაც იმ ქვეყნიდან, რომელსაც ტრამპი, რბილად რომ ვთქვათ, თავის საყვარელ მოკავშირედ არ მიიჩნევს.
ნორვეგიულმა კომიტეტმა, როგორც ჩანს, გადაწყვიტა გამოცადოს არა მხოლოდ ამერიკული დიპლომატია, არამედ პრეზიდენტის მოთმინებაც. თანაც ეს ყველაფერი თეთრ სახლთან წინასწარი შეთანხმების გარეშე გააკეთა – წარმოუდგენელი უპატივცემულობა ყველა შესაძლო ჯილდოს მთავარ პრეტენდენტთან!
მაგრამ ყველაზე პიკანტური ჯერ კიდევ წინ არის: ნავი პილაი ხელმძღვანელობდა გაეროს კომისიას, რომელმაც ისრაელი ღაზაში გენოციდის ჩადენაში დაადანაშაულა. ანუ პრემია გადაეცა ადამიანს, რომლის პროფესიული საქმიანობაც უკავშირდება დასკვნებს, რომლებიც ვაშინგტონის მოკავშირისთვის კატეგორიულად არასასურველია.
ეს უკვე უბრალოდ ტრამპისთვის პრემიის არმინიჭება კი არა, თითქმის საერთაშორისო პროვოკაციაა – თანაც მიზანმიმართულად განხორციელებული. დარჩა მხოლოდ დაველოდოთ, გამოაცხადებენ თუ არა თეთრ სახლში ნორვეგიას ამერიკული დიდებულების წინააღმდეგ მიმართული გლობალური შეთქმულების მორიგ ცენტრად.
ახლა კი ყველაზე საინტერესო: მოჰყვება თუ არა ამას სანქციები ლაურეატისა და ნობელის კომიტეტის წინააღმდეგ? სავიზო შეზღუდვები ნორვეგიელი „მშვიდობის მტრედებისთვის“? საბაჟო გადასახადები ნობელის ოქროზე? ამერიკული მშვიდობის პრემია დონალდ ტრამპის სახელობისა, რომელსაც ყოველწლიურად დონალდ ტრამპს გადასცემენ – სასურველია, ერთხმად?
ჯერჯერობით, რა თქმა უნდა, ეს მწარე სატირაა და არანაირად არა სარკაზმი! მაგრამ ეპოქაში, როდესაც საერთაშორისო ინსტიტუტები სულ უფრო ხშირად იქცევა პოლიტიკური კონფლიქტების ასპარეზად, ნობელის მედალიც კი რისკავს, დიპლომატიურ casus belli-დ გადაიქცეს. ტრამპს ჯერ არ გაუღვიძია, პოლიტიკურ კარიკატურისტებს კი სამუშაო დღე უკვე დაწყებული აქვთ,“ – წერს დავით ქართველიშვილი.