ის არის პირდაპირ მტრულად განწყობილი პერსონა, – განაცხადა საპროცედურო საკითხთა და წესების საპარლამენტო კომიტეტის თავმჯდომარემ დავით მათიკაშვილმა მაკკეინის ინსტიტუტის გლობალური დემოკრატიის პროგრამების უფროსის, ლორა თორნტონის განცხადებების შეფასებისას.
მათიკაშვილის შეფასებით, თორნტონის განცხადებები მეტყველებს იმაზე, რომ იგი ვერ იტანს საქართველოს.
„ამ ქალბატონს რომ ჭურვის გასაშვები ღილაკი მისცეს ვინმემ მისცეს, მგონი, სიამოვნებით დააწვება ამ ღილაკს და ჭურვებს ესვრის საქართველოს. ისეთი განცხადებები აქვს მანამდეც, ისეთ რამეებზე საუბრობს დღეს, რომ ეს არის სამარცხვინო, ჩვენი ქვეყნისთვის მტრული განცხადებები, რომელთა შინაარსი არის ცალსახა, რომ ეს ქალბატონი ვერ იტანს, ეზიზღება საქართველო და ქართველი ხალხი. როგორ შეიძლება, ეკონომიკური კრიზისი უსურვოს ქართველ ხალხს, როგორ შეიძლება, მოისაკლისოს გვამების არარსებობა ამ ინსტიტუტმა, რომლის წარმომადგენელიც ის არის საქართველოში და როგორ შეიძლება, ამის შემდეგ ის დარჩეს ჩვენი ქვეყნის მეგობრად? ის არის პირდაპირ მტრულად განწყობილი პერსონა“, – განაცხადა დავით მათიკაშვილმა.
მაკკეინის ინსტიტუტის გლობალური დემოკრატიის პროგრამების უფროსი, ლორა თორნტონი გამოცემა Civil.ge-სთვის დაწერილ სტატიაში აცხადებს, რომ „საქართველოში ეკონომიკური კრიზისის შექმნაა საჭირო, რათა პროტესტმა გაიმარჯვოს და ხელისუფლებაში ბზარი გაჩნდეს“.
მისივე განცხადებით, „მომიტინგეებმა საქართველოში პროტესტი სამოქალაქო დაუმორჩილებლობასა და გაფიცვაში უნდა გადაიყვანონ“.