ეს ერთი მხრივ უნდა ჩაითვალოს ქვეყნის შიდა საქმეებში ჩარევად და მეორე მხრივ, წახალისებად ძალადობრივი ჯგუფებისა, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, ვლადიმერ ბოჟაძემ.
იგი ამგვარად ეხმიანება შვედეთის საგარეო საქმეთა სამინისტროს მიერ სოციალურ ქსელში გამოქვეყნებულ პოსტს, რომლითაც ეს უწყება საქართველოში პროტესტის მე-100 დღეს გამოეხმაურა და პროტესტის მონაწილეებს მხარდაჭერა გამოუცხადა.
„რაც შეეხება ასეთი ტიპის განცხადებებს, ეს ერთის მხრივ უნდა ჩაითვალოს ქვეყნის შიდა საქმეებში ჩარევად და მეორე მხრივ, ეს უნდა ჩაითვალოს წახალისებად იმ ძალადობრივი ჯგუფებისა, რომლებიც დღეების განმავლობაში ქვებით, „მოლოტოვის კოქტეილებისა“ და პიროტექნიკის გამოყენებით ებრძოდნენ ქართულ პოლიციას და და ცდილობდნენ, ეს პარლამენტის შენობა გადაეწვათ, შემოჭრილიყვნენ და ასე შემდეგ. ამიტომ ეს დამოკიდებულება არის სრულიად უსამართლო ჩევნს ქვეყანასთან მიმართებაში, თუმცა, გვესმის კარგად, რომ ეს ყველაფერი უკავშირდება მათ შორის რუსეთ-უკრაინის ომის საკითხებს და იმას, რომ საქართველოს ხელისუფლებამ ყველაფერი გააკეთა იმისათვის, რომ შეგვენარჩუნებინა ქვეყანაში მშვიდობა და სტაბილურობა“, – განაცხადა ვლადიმერ ბოჟაძემ.