ჩეხეთის რესპუბლიკის წარმომადგენლებსაც აქვთ პოზიცია დაფიქსირებული სააკაშვილთან დაკავშირებით, ამიტომ ერთადერთი, რასაც სააკაშვილის მეგობრებისგან მოველით, არის ბოდიში ქართველი ხალხის მიმართ, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პარლამენტის თავმჯდომარეს კითხვა დაუსვეს ჩეხეთის პარლამენტის რეზოლუციასთან დაკავშირებით, რომელშიც არჩევნების ჩატარების მოთხოვნაზეა საუბარი, რაზეც შალვა პაპუაშვილმა უპასუხა: „ელოდონ ახალ არჩევნებს“.
„სააკაშვილის მეგობრებისგან შენიშვნის ერთ სიტყვასაც კი არ მივიღებთ. სააკაშვილის მეგობრებისგან ერთადერთს მოველით, ეს არის ბოდიში ქართველი ხალხის მიმართ. სხვა დანარჩენი ჩვენთვის უინტერესოა. თქვენ ნახეთ ჩეხეთის ხელისუფლების მხარდაჭერა ევროპარლამენტის რეზოლუციის მიმართ, სადაც სააკაშვილის გათავისუფლებაა მოთხოვნილი. ჩეხეთის რესპუბლიკის წარმომადგენლებსაც აქვთ პოზიცია დაფიქსირებული სააკაშვილთან დაკავშირებით. ამიტომ ერთადერთი, რასაც სააკაშვილის მეგობრებისგან მოველით, არის ბოდიში ქართველი ხალხის მიმართ. ამის ფონზე სხვა დანარჩენი, რა თქმა უნდა, არის აბსოლუტურად გაუფასურებული. ადამიანები, რომლებიც მხარს უჭერენ კორუმპირებულ ადამიანს, ადამიანების წამების სისტემის შემქნელს, მათგან რა რეკომენდაცია, შენიშვნა, რა სიტყვა ან კომენტარი უნდა მივიღოთ?“ – განაცხადა შალვა პაპუაშვილმა.