ლონდონის საერთაშორისო აეროპორტი „ჰიტროუ“ დღის ბოლომდე მუშაობას აჩერებს.
აეროპორტის ოფიციალური განცხადების მიხედვით, ამის მიზეზი აეროპორტთან ახლოს მდებარე ელექტროქვესადგურზე გაჩენილი ხანძარი გახდა.
„სქაი ნიუსის“ ცნობით, ხანძარი ღამით გეიზის რაიონში გაჩნდა, აეროპორტიდან დაახლოებით 2,4 კილომეტრის დაშორებით. ადგილზე ლონდონის სახანძრო სამსახურებია მობილიზებული.
ხანძრის შედეგად ელექტროენერგიასთან დაკავშირებული პრობლემები შეიქმნა, რომელიც შეეხო არა მხოლოდ აეროპორტს, არამედ მიმდებარე რაიონებსაც.
ინციდენტის ზონიდან 150-მდე ადამიანია ევაკუირებული, ასევე უსაფრთხოების 200-მეტრიანი ზონა განისაზღვრა.
როგორც აეროპორტის განცხადებაშია ნათქვამი, „ჰირტოუს“ დაკეტვა 1300-ზე მეტ რეისს შეეხება.
როგორც „გარდიანი“ აეროპორტის პრესმდივანზე დაყრდნობით წერს, უახლოეს დღეებში აეროპორტის მუშაობაში შეფერხებებია მოსალოდნელი.
„მეხანძრეები ინციდენტზე რეაგირებენ, თუმცა ჩვენ არ გვაქვს ზუსტი ინფორმაცია, როდის აღდგება ელექტრომომარაგება საბოლოოდ. უახლოეს დღეებში მუშაობაში მნიშვნელოვან შეფერხებას ველოდებით“, – განაცხადა მან.
უცხოური მედია წერს, რომ ამ დროისთვის უკვე 120 რეისია სხვა აეროპორტებში გადამისამართებული, ზოგიერთი მათგანი გამოფრენის პუნქტში დაბრუნდა.