მოსამართლე ჯეიმს პოლ ეტკენმა შეაჩერა „ამერიკის ხმის“ 1 300 ჟურნალისტისა და სხვა თანამშრომლების გათავისუფლება, რომლებიც მიმდინარე თვის დასაწყისში მოულოდნელად შვებულებაში გაუშვეს. ინფორმაციას ამის შესახებ „როიტერი“ ავრცელებს.
მოსამართლემ საკუთარ გადაწყვეტილებაში განმარტა, რომ ტრამპის ადმინისტრაციას არ შეუძლია, ცალმხრივად შეწყვიტოს „ამერიკის ხმის“ მუშაობა, რომელიც დამტკიცებული და დაფინანსებულია კონგრესის მიერ. მოსამართლის დადგენილებით, ამ პროგრამების დაფინანსების გაუქმებას დასჭირდება კონგრესის თანხმობა.
მოსამართლე ეტკენს არ მოუთხოვია „ამერიკის ხმის“ მაუწყებლობის განახლება, თუმცა, მისი განკარგულების თანახმად, თანამშრომლები არ უნდა გათავისუფლდნენ სამსახურიდან, ვიდრე სასამართლო პროცესი არ დაადგენს, იყო თუ არა მედიასაშუალების დახურვა ფედერალური კანონის „თვითნებური და ახირებული“ დარღვევა.
„ეს არის პრესის თავისუფლებისა და პირველი შესწორების გადამწყვეტი გამარჯვება და მკვეთრი საყვედური ადმინისტრაციისთვის, რომელმაც აჩვენა სრული უგულებელყოფა იმ პრინციპების მიმართ, რომლებიც განსაზღვრავს ჩვენს დემოკრატიას“, – აღნიშნა მოსარჩელეთა ადვოკატმა, ენდრიუ სელიმ.
აშშ-ის გლობალური მედიის სააგენტომ, რომელიც ზედამხედველობს „ამერიკის ხმას“, რადიო „თავისუფალ ევროპას“ და მთავრობის მიერ დაფინანსებულ სხვა მედიასაშუალებებს, დაუყოვნებლივ არ უპასუხა პარასკევს კომენტარის თხოვნას.
„ამერიკის ხმის“ ჟურნალისტებმა და მათმა პროფკავშირებმა აშშ-ის გლობალური მედიის სააგენტოსა და მისი დირექტორის, ვიქტორ მორალესის წინააღმდეგ სარჩელი გასულ კვირას შეიტანეს. მათი თქმით, „ამერიკის ხმის“ დახურვა სიტყვის თავისუფლების უფლებას არღვევდა, რაც კონსტიტუციის პირველი შესწორებით არის გარანტირებული.
აშშ-ის გლობალური მედიის სააგენტო „ამერიკის ხმას“ და „რადიო თავისუფლებას“ ზედამხედველობს. თავად სააგენტო კანონის დარღვევას უარყოფს.
„ამერიკის ხმის“ თანამშრომლების სარჩელი ერთ-ერთია იმ ოთხ სარჩელს შორის, რომლებიც წარდგენილია ტრამპის ადმინისტრაციის მცდელობის წინააღმდეგ, დახუროს მთავრობის მიერ დაფინანსებული მედიაპროგრამები.
მანამდე აშშ-ის ფედერალურმა სასამართლომ დროებით შეაჩერა „რადიო თავისუფლების“ დახურვა. კერძოდ, აშშ-ის ფედერალურმა სასამართლომ დააკმაყოფილა „რადიო თავისუფალი ევროპა/რადიო თავისუფლების“ მოთხოვნა და აშშ-ის გლობალური მედიის სააგენტოს (USAGM) მიერ საგრანტო ხელშეკრულების გაწყვეტის შესახებ გადაწყვეტილების მოქმედება დროებით შეაჩერა.