საქართველოს სპორტის მინისტრი შალვა გოგოლაძე ბოსტონში ფიგურული ციგურაობის მსოფლიოს ჩემპიონატზე ქართველი სპორტსმენების ასპარეზობებს დაესწრო. მსოფლიოს ჩემპიონატის დასრულების შემდეგ მინისტრმა ქართველ მოციგურავეებს 2026 წლის ზამთრის ოლიმპიადაზე ლიცენზიების მოპოვება მიულოცა და შემდგომ ასპარეზობებზე წარმატებები უსურვა.
მსოფლიოს პირველობაზე საქართველომ ექვსი ლიცენზია მოიპოვა. ანასტასია მეტელკინასა და ლუკა ბერულავას სპორტულმა წყვილმა ჩემპიონატზე მეოთხე პოზიცია დაიკავა, ნიკა ეგაძემ მეცხრე, დიანა დევისისა და გლებ სმოლკინის წყვილმა კი მეათე, ამ შედეგით საქართველომ მამაკაცთა კატეგორიაში, სპორტულ წყვილებსა და სპორტულ ცეკვებში ოლიმპიადის ორ-ორი საგზური მიიღო.
თავისუფალ პროგრამაში გადასვლა ვერ შეძლონ ანასტასია გუბანოვამ, რომელმაც მოკლე პროგრამაში 47,31 ქულა მიიღო, რაც 28-ე შედეგი აღმოჩნდა. გუბანოვა ოლიმპიური საგზურის მოპოვებას სექტემბერში პეკინში დაგეგმილ ტურნირზე შეეცდება, რომელზეც ხუთი ლიცენზია გათამაშდება.
ქართველი სპორტსმენები მსოფლიოს ჩემპიონატზე საქართველოს სპორტის სამინისტროს მხარდაჭერით იმყოფებოდნენ.