მე ვფიქრობ, გარკვეულწილად გავლენას იქონიებს, მაგრამ სამწუხაროდ, სრულად არა, – ასე უპასუხა „ერთიანი ნეიტრალური საქართველოს“ დამფუძნებელმა გელა ნიკოლაიშვილმა გადაცემა „დღის ქრონიკაში“ წამყვანის კითხვას – პარლამენტის საგამოძიებო კომისიის სხდომები იქონიებს თუ არა რაიმე გავლენას იმ თაობაზე, რომელსაც შეიძლება წარმოდგენა არ ჰქონდეს, თუ რა ხდებოდა „ნაციონალური მოძრაობის“ ხელისუფლებაში ყოფნის დროს.
„საზოგადოების ძალიან დიდი ნაწილი უყურებს ამ ადამიანების გარკვეულ ნაწილს, რომელსაც არაფრის მოსმენა არ უნდა, გონებით კი არა მხოლოდ ემოციებით ხელმძღვანელობენ, მხოლოდ რწმენა აქვთ იმისი, რომ ეს მთავრობა არის მოღალატე, პრორუსული, უფლებების შემლახველი და იმიტომ ჩაანაცვლა ის მთავრობა ამდენი ხალხის მხარდაჭერით, რომ ეს იყო რუსეთის შეკვეთა, რუსეთის სპეცოპერაცია. ადამიანების ამ კატეგორიას ვადარებ არქიფო სეთურის მრევლს, რომლებიც „პოლიქრონიონ“ – ყიჟინებენ და არაფრის მოსმენა არ უნდათ. ამ კატეგორიის ადამიანებისთვის, რა თქმა უნდა არაფერს მნიშვნელობა არ აქვს, მაგრამ მადლობა ღმერთს, ყველა ასეთი არ არის, ძალიან ბევრი არის შეცდომაში შეყვანილი, ძალიან ბევრს უნდა რეალური სიმართლის გაგონება, და ამ ნაწილისთვის ამას ძალიან დიდი მნიშვნელობა ექნება. უბრალოდ დაფიქრდებიან რა იყო, და შეადარებენ დღევანდელ პერიოდს, თუნდაც ციხის პატიმრებთან დამოკიდებულებაში, თუნდაც კერძო საკუთრებასთან დამოკიდებულებაში, თუნდაც იმაში, რომ რომელმა ხელისუფლებამ შეინარჩუნა მშვიდობა და რომელმა ხელისუფლებამ არ დაკარგა ტერიტორიები“, – აცხადებს ნიკოლაიშვილი.