პერუს რესპუბლიკაში (რეზიდენციით ქ. ბრაზილია) საქართველოს საგანგებო და სრულუფლებიანმა ელჩმა, ზურაბ მჭედლიშვილმა რწმუნებათა სიგელები გადასცა პერუს პრეზიდენტს, დინა ბოლუარტეს.
საელჩოს ცნობით, პრეზიდენტის სასახლეში გამართული საზეიმო ცერემონიალის ფარგლებში შეხვედრა გაიმართა საქართველოს ელჩსა და პერუს საგარეო საქმეთა მინისტრს, ელმერ შიალერ სალსედოს შორის.
მხარეებმა განიხილეს ქვეყნებს შორის არსებული ორმხრივი ურთიერთობები და სამომავლო პროექტები, რომლებიც ხელს შეუწყობს თანამშრომლობის კიდევ უფრო განვითარებას.
საქართველოს ელჩმა გამოხატა მზაობა, აქტიურად შეუწყოს ხელი, როგორც პოლიტიკური დიალოგისა და ორმხრივი ვიზიტების ორგანიზებას, ასევე ეკონომიკისა და კულტურის სფეროებში ქვეყნებს შორის არსებული კავშირების განვითარებას.
ზურაბ მჭედლიშვილმა მადლობა გადაუხადა პერუს საგარეო საქმეთა მინისტრს საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის.
თავის მხრივ, მინისტრმა სალსედომ წარმატებული დიპლომატიური მისია უსურვა ელჩს და საქართველოსთან მჭიდრო თანამშრომლობის მზაობა გამოხატა.