უკრაინის პრეზიდენტი ვოდევილის ჟანრის არტისტი იყო, რომელიც რთულ მდგომარეობაში აღმოჩნდა, – განაცხადა ამერიკის სახაზინო მდივანმა სკოტ ბესენტმა ტაკერ კარლსონის პოდკასტში.
სკოტ ბესენტმა კიევში ვიზიტი გაიხსენა, როდესაც ზელენსკის მინერალების შეთანხმების პირველი ვარიანტი ჩაუტანა ხელმოსაწერად.
მისი თქმით, ზელენსკიმ პირობა დადო, რომ შეთანხმებას მიუნხენის კონფერენციაზე მოაწერდა ხელს, თუმცა დოკუმენტისთვის ხელი არ მოუწერია არც მიუნხენში და არც ოვალურ კაბინეტში, სადაც ცნობილი ინციდენტი მოხდა.
როგორც ამერიკის სახაზინო მდივანი ამბობს, ზელენსკის ცუდი მრჩევლები ჰყავს, თუმცა მის მთავრობაში რამდენიმე კარგი მინისტრიცაა.
„ის არტისტი იყო ვოდევილის ჟანრის. ჩვეულებრივი ადამიანი იყო, მაგრამ შემდეგ ის რთულ მდგომარეობაში აღმოჩნდა, იქცა გმირად, მაგრამ, ვფიქრობ, ის ჩარჩა თავის როლში და ახლა ძლიერი ზეწოლის ქვეშაა. ვფიქრობ, რომ მისი გარემოცვის წრიდან ზოგიერთი მას კარგ რჩევებს არ აძლევს. მას იდეალური მრჩევლები არ ჰყავს, თუმცა მის მთავრობაში ბევრი კარგი კადრიცაა“, – განაცხადა ბესენტმა.