“დიდმა ბრიტანეთმა ახალი საგრანტო პროგრამა დააანონსა, რომელიც მიმართულია აგონიაში მყოფი რადიკალი ძალების გამოცოცხლების უშედეგო მცდელობისკენ”

ჩვენს ხელისუფლებას ჰქონდა გარკვეული პოზიტიური მოლოდინი მას შემდეგ, რაც აშშ-ში ახალი პრეზიდენტი იქნა არჩეული, რომელმაც შეურიგებელი ბრძოლა დააანონსა „დიფ სთიეთის“ წინააღმდეგ, თუმცა, სამწუხაროდ, ჯერჯერობით რაიმე ხელშესახებ შედეგს ვერ ვხედავთ. მეტსაც გეტყვით – ერთგვარად, სახე იცვალა ამ გლობალურმა ომის პარტიამ, – განაცხადა საპარლამენტო უმრავლესობის წევრმა, გიორგი სოსიაშვილმა.

მისი თქმით, „დიფ სთეითმა“ სახე იცვალა და აშშ-ის ნაცვლად, გლობალური ომის პარტიის ცენტრად ახლა დიდი ბრიტანეთი იქცა, რაზეც საქართველოს წინააღმდეგ ამ ქვეყნის მიერ გადადგმული ნაბიჯები – მოსამართლეების უსაფუძვლო მიზეზით სანქცირება და რადიკალების გამოცოცხლებისკენ მიმართული საგრანტო პროგრამის გამოცხადება მეტყველებს.

„რადიკალები ხშირად საუბრობენ იმაზე, თითქოს, ჩვენ რაღაც გვეჩვენება და მითურ არსებებს ვხატავთ. სინამდვილეში, ეს მითური არსება კი არა, ეს არის „დიფ სთიეთი“, რომელმაც მსოფლიოს ბევრ ქვეყანაში გაიდგა ფესვები და არია სიტუაცია. ფილოსოფოს ზაზა შათირიშვილის წერილში იყო ლოგიკურ დასკვნებზე დაყრდნობით გაკეთებული პროგნოზი, რომ „დიფ სთეითმა“ იცვალა სახე, მისი მოდერნიზაცია მოხდა და გლობალური ომის პარტიის დაწოლის ცენტრი აშშ-დან გადავიდოდა ევროპის ქვეყნებში. შედეგმაც არ დააყოვნა – მოგეხსენებათ, რამდენიმე დღის წინ, სამწუხაროდ ასეთი დიდი ისტორიის მქონე ქვეყანაში არის მოკალათებული გლობალური ომის პარტიის წარმომადგენლობა, რომლებმაც დაიწყეს ღონისძიებათა ახალი ციკლი ჩვენი სახელმწიფოს წინააღმდეგ, რაც გამოიხატა შემდეგში: ჯერ ამ უსაფუძვლო, თითიდან გამოწოვილი ეჭვების საფუძველზე ჩვენი მოსამართლეების სანქცირება და დამოუკიდებელი ქვეყნის სასამართლო სისტემაში უხეში ჩარევის მცდელობა, შემდეგ უკვე დაანონსებული ახალი საგრანტო პროგრამა, რომელიც პირდაპირ მიმართულია აგონიაში მყოფი რადიკალი ძალების გამოცოცხლების უშედეგო მცდელობა იყოს. დარწმუნებული ვარ, ამას არანაირი შედეგი არ მოჰყვება, მაგრამ მცდელობა არის ფრიად სამწუხარო, რადგან ბრიტანეთის მთავრობამ ოფიციალურ გვერდზე გამოაქვეყნა, საგარეო საქმეთა სამინისტრომ დააანონსა საგრანტო პროგრამა, რომელიც პირდაპირ ISFED-ზეა მორგებული. საზოგადოებას შევახსენებ, რომ ეს ის ორგანიზაციაა, რომელიც პარალელური დათვლის გაყალბების დიდოსტატად გადაიქცა“, – განაცხადა გიორგი სოსიაშვილმა.