გახსოვთ, 2024 წლის არჩევნებზე როგორი სიცრუის ტირაჟირებას ახდენდა ISFED-ი მთელს საზოგადოებაში, მთელს მსოფლიოში, თითქოს, საქართველოში არჩევნები გაყალბდა. ამ ორგანიზაციამ ვერც ერთი არგუმენტი ვერ წარმოადგინა, როდესაც პროკურატურის მოწოდება იყო, წარმოედგინათ არგუმენტები, თუკი არჩევნების გაყალბების რაიმე მცდელობას ჰქონდა ადგილი, თუმცა, ეს იყო სიცრუის ტირაჟირება. ამ ორგანიზაციის დაფინანსება და ახალი საგრანტო პროგრამის მის ინტერესებზე მორგება არის პირდაპირი მცდელობა, წინასაარჩევნო დესტრუქცია განახორციელოს ბრიტანეთის წარმომადგენლობამ საქართველოში და რადიკალები გამოაცოცხლოს, – ამის შესახებ საპარლამენტო უმრავლესობის წევრმა, გიორგი სოსიაშვილმა განაცხადა.
როგორც სოსიაშვილმა აღნიშნა, საქართველოში ოპოზიცია არ არსებობს, სახეზეა აგენტურა, რომელიც სწორედ სხვადასხვა ორგანიზაციისგან იკვებება და ამ აგენტურის დაფინანსების ახალი ტალღა იწყება. მისივე თქმით, ხელისუფლება, რომელიც ეროვნულ ინტერესებსა და მოსახლეობის უსაფრთხო მომავალზეა ორიენტირებული, ებრძვის ძალას, რომელსაც სახელმწიფო გადატრიალება და სახელმწიფოს ჩამოშლა სურს.
“არჩევნების შემდეგ შედეგი, რაც ვიხილეთ, არის ის, რომ პრაქტიკულად, საქართველოში ოპოზიცია არ არსებობს – სახეზე გვაქვს აგენტურა, რომელიც იკვებება სხვადასხვა ორგანიზაციებისგან და ამ აგენტურის დაფინანსების ახალ ტალღასთან, ახალ მცდელობასთან გვაქვს საქმე. კიდევ ერთხელ მინდა ხაზი გავუსვა, რომ საქართველოს ხელისუფლება ორიენტირებულია ჩვენი ხალხის უსაფრთხო მომავალზე, ჩვენი ხალხის ეროვნულ ინტერესებზე. ჩვენ არ ვებრძვით ქარის წისქვილებს, ჩვენ ვებრძვით იმ რეალურ ძალას, რომელიც ორიენტირებულია ჩვენს ქვეყანაში სახელმწიფო გადატრიალებაზე, რევოლუციური სცენარების განხორციელებასა და ქვეყნის ჩამოშლაზე, რაც, ბუნებრივია, არ და ვერ განხორციელდება. ამიტომ მინდა სავსებით გავიზიარო პრემიერ-მინისტრის განცხადება, რომ ვერავინ ვერასოდეს შეარყევს ჩვენი ქვეყნის სუვერენიტეტსა და დამოუკიდებლობას. საქართველო შემდგარი სახელმწიფოა და ეს მორიგი უშედეგო მცდელობაა წინასაარჩევნო დესტრუქციის, რომ როგორმე გამოაცოცხლონ ეს რადიკალები, რომლებიც ორიენტირებული არიან ქვეყნის დაქცევაზე.” – განაცხადა გიორგი სოსიაშვილმა ჟურნალისტებთან საუბრისას.