გონჩარენკო ნორმალური არ არის, – ასე უპასუხა პარლამენტის საგამოძიებო კომისიის თავმჯდომარემ, თეა წულუკიანმა საქართველოს პირველი არხის გადაცემის „აქტუალური თემა მაკა ცინცაძესთან ერთად“ წამყვანის შეკითხვას, როგორ შეაფასებს რადას დეპუტატის, ალექსეი გონჩარენკოს გზავნილს, რომელიც სულ ცოტა ხნის წინ ტანკებით ცხინვალისკენ გასეირნებისკენ მოგვიწოდებდა, ევროსაბჭოდან კი საკმაოდ მგზნებარედ მიმართა ქართველებს, „თბილისო“ იმღერა და თქვა „უფრო მალე, ვიდრე ბევრს ჰგონია, საქართველო იქნება თავისუფალი, შევხვდებით რუსთაველზე, ისევ ვიმღერებთ „თბილისოს“, შევჭამთ ხევსურულ ხინკალს, ხაჭაპურს და დავლევთ საფერავს“.
„ძალიან უხერხულია, ამას რომ ვამბობ, მაგრამ უნდა ვთქვა, რომ ბატონი გონჩარენკო არ არის ნორმალური. ჩვენ ეს უნდა გავიგოთ, იმიტომ, რომ როდემდე შეიძლება, ახლა ამ ადამიანის გამონათქვამებზე კომენტარები ვაკეთოთ? კომენტარს რომ აკეთებ, ესე იგი, სერიოზულად აღიქვამ. ეს არის დიაგნოზი ჩემთვის, რომ ეს ადამიანი არ არის იმ განზომილებაში, სადაც საშუალო დონის თუნდაც მოაზროვნე ადამიანი, შესაძლოა, იმყოფებოდეს. ერთადერთი პასუხი შეიძლება მე პირადად მქონდეს, რომ მან მიხედოს თავის ქვეყანას, რომელიც დაანგრიეს და გააუბედურეს თითქმის ყველა ოჯახი ამ უზარმაზარ ქვეყანაში. ზოგმა ოჯახმა მათი, მათ შორის, გონჩარენკოს უპასუხისმგებლობის, გიჟური გადაწყვეტილებების და ცეცხლზე ნავთის დასხმის შედეგად ერთი კი არა, ორი და მეტი წევრი დაკარგა. ბატონმა გონჩარენკომ უნდა მიხედოს თავის ქვეყანას, სადაც ათეულ კილომეტრებზეა გადაჭიმული დაღუპულთა საფლავები და ძაძები აცვია თითქმის ყველა ქალს. აი, ამ ქვეყანას უნდა მიხედოს და აიღოს პასუხისმგებლობა იმ უბედურებაზე, რაც უკრაინას დაემართა“, – განაცხადა წულუკიანმა.
როგორც თეა წულუკიანმა აღნიშნა, საქართველოს ამ უბედურებამ რამდენიმე სანტიმეტრში ჩაუარა.
„ჩვენ ამ უბედურებამ რამდენიმე სანტიმეტრში ჩაგვიარა. ქვეყნის ხელისუფლებაში, ხომ შესაძლოა, ყოფილიყო „ქართული ოცნებისნაირი“ ხელისუფლება, პოლიტიკური პარტია, რომელსაც ომი არ უნდა და არ თანხმდება მეორე ფრონტის გახსნას, მაგრამ მას არ ჰყოლოდა ისეთი ძლიერი საყრდენი ხელმძღვანელი, როგორც არის ბიძინა ივანიშვილი, ჩვენ ვიქნებოდით უბედურებაში. ამ ერთმა ადამიანმა, ვგულისხმობ ბიძინა ივანიშვილს, თავის თავზე აიღო დარტყმები და არაფრის ფასად არ დათმო ქვეყნის ინტერესი. ამისთვის მას პიროვნულად, პირადად და ოჯახის თვალსაზრისით მოუწია ძალიან დიდი ფასის გადახდა, მაგრამ ის ამ ფასს იხდის, ოღონდაც აქ არ ატყდეს ის, რაც მოხდა უკრაინაში და ღმერთმა დაგვიფაროს, აქ ათეულ კილომეტრებზე სასაფლაოების გახსნა არ დაგვჭირდეს. რამდენიმე სანტიმეტრზე ჩაგვიარა ამ საფრთხემ და ძალიან ბევრი ქილიკი მესმის მე პირადად, ეს თქვენი ზღაპრებია, ომი რეალური არ იყოო და ა.შ. მე, ზოგადად, თამამად არასდროს არ ვსაუბრობ, თუ არ ვარ მოწმე, მონაწილე ან თუ ზუსტად არ ვიცი და შემიძლია, თამამად გითხრათ, რომ რეალური, კონკრეტული შეთავაზებები იყო, გადადგით ეს და ეს ნაბიჯები და მერე რაღაც იქნება. ჩვენ ეს ნაბიჯები არ გადავდგით. იმიტომ კი არა, რომ ჩვენ ვართ მაგრები, იმიტომ, რომ გვყავს ხელმძღვანელი, რომელმაც შეძლო ამორტიზება იმ დიდი დარტყმების, რაც სადამსჯელო ღონისძიებების სახით ჩვენზე წამოვიდა. ეს რისკები მუდმივად არსებობს დღესაც, ზოგჯერ მაღალი და ზოგჯერ დაბალი, დღეებს გააჩნია. ამიტომ, ჩვენ უნდა გავაგრძელოთ მოთმინების, გონივრულობის პოლიტიკა. არიან მავნებლური ძალები, რომლებიც მაინც ცდილობენ პროვოკაციებს ქუჩაში. სხვა არაფერია, თუ არა პროვოკაცია, როდესაც მემორიალთან არც კი მიუშვეს 1989 წლის 9 აპრილის მონაწილე პირები, რომლებიც უკვე გარკვეულ ასაკში არიან, ყოველ შემთხვევაში, მათზე ბევრად უფროსები არიან, ვინც რამდენიმე დღის წინ იქ ჟივილ-ხივილი მოაწყო. ეს პროვოკაციაა, მაგრამ ჩვენ არ ავყვებით ასეთ და სხვა უფრო მძიმე პროვოკაციებს, რაც არ უნდა რთული იყოს ეს და რაღაცნაირად უნდა გავიდეთ ყველანი ერთად ფონს“, – განაცხადა თეა წულუკიანმა.