ეროვნული თავდაცვის აკადემიაში თავდაცვის ძალების დღისადმი მიძღვნილი ღონისძიება გაიმართა. ღონისძიებაზე აკადემიის რექტორმა, ბრიგადის გენერალმა მამია ბალახაძემ სიტყვით მიმართა აკადემიის პირად შემადგენლობას და თავდაცვის ძალების დღე მიულოცა:
,,მსურს მოგილოცოთ თავდაცვის ძალების დღე და მადლობა გადაგიხადოთ სამსახურისთვის. მადლობა მინდა გითხრათ იმ შრომისა და ძალისხმევისთვის, რასაც ჩვენ ყველანი ერთად ვეწევით ჩვენი სამშობლოს უკეთესი მომავლისათვის, მისი გამთლიანებისათვის.
ეროვნული თავდაცვის აკადემიის ხელმძღვანელობა მუდმივად არის ორიენტირებული სიახლეების დანერგვაზე ყველა მიმართულებით და თითოეული თქვენგანისთვის უკეთესი პირობების შექმნაზე.
მინდა მივესალმო ჩვენს დაჭრილ-დაშავებულ სამხედრო მოსამსახურეებს, რომლებმაც საკუთარი ჯანმრთელობა მსხვერპლად გაიღეს სამშობლოს სამსახურში. ქედს ვიხრი დაღუპული სამხედრო მოსამსახურეების ხსოვნის წინაშე და უდიდეს პატივისცემას გამოვხატავ მათი ოჯახების წინაშე.
გისურვებთ წარმატებებს ჩვენი ქვეყნის სამსახურში და კიდევ ერთხელ გილოცავთ თავდაცვის ძალების დღეს!”.
აკადემიის ინსტიტუციონალურ განვითარებაში შეტანილი წვლილისათვის, დაკისრებული მოვალეობის კეთილსინდისიერად და მაღალხარისხოვნად შესრულებისათვის – ორი სამხედრო მოსამსახურე დაჯილდოვდა ცეცხლსასროლი იარაღით, ფასიანი საჩუქარი გადაეცათ ექვს სამხედრო მოსამსახურეს, სტატუეტებით „იუნკერი“ დაჯილდოვდა ორი სამოქალაქო პირი. დაკისრებული მოვალეობის კეთილსინდისიერად და მაღალხარისხოვნად შესრულებისთვის, აკადემიის რექტორის ბრძანებით ,,საპატიო სიგელი” გადაეცათ ათ სამხედრო მოსამსახურეს.
