თეთრი სახლის სპიკერმა, კაროლინ ლევიტმა განაცხადა, რომ აშშ-ის პრეზიდენტი, დონალდ ტრამპი ყველაფერს აკეთებს, რათა რაც შეიძლება სწრაფად დაასრულოს ომი რუსეთსა და უკრაინას შორის.
თეთრი სახლის სპიკერის თქმით, ეს, კერძოდ, დონალდ ტრამპსა და ვლადიმირ პუტინს შორის სატელეფონო საუბრის ერთ-ერთი თემა გახდება.
„მაგრამ მთელი ამ კონფლიქტის განმავლობაში, მას შემდეგ, რაც [ეს კონფლიქტი] ჯო ბაიდენისგან მემკვიდრეობით მიიღო, ის მკაფიოდ აცხადებდა: არ დაგავიწყდეთ, რომ ეს არის ომი, რომელიც წინა ადმინისტრაციის არაკომპეტენტურობისა და სისუსტის გამო დაიწყო. და პრეზიდენტი ტრამპი ყველაფერს აკეთებს, რომ ეს გამოასწოროს. მან ორივე მხარეს ნათლად აჩვენა, რომ სურს მშვიდობიანი დარეგულირება“, – აღნიშნა კაროლინ ლევიტმა.
„ვნახოთ, როგორ ჩაივლის სატელეფონო საუბარი, მაგრამ პრეზიდენტმა მკაფიოდ განაცხადა, რომ მისი მიზანია ცეცხლის შეწყვეტის მიღწევა და ამ კონფლიქტის დასრულება. ის დაიღალა და იმედგაცრუებულია კონფლიქტის ორივე მხარით. პრეზიდენტმა და მისმა გუნდმა უზარმაზარი ძალისხმევა გასწიეს ამ ძალიან რთული ომის მოსაგვარებლად, რომელიც, კიდევ ერთხელ ვიმეორებ, წინა ადმინისტრაციის სისუსტის გამო დაიწყო“, – დასძინა მან.