ნატო-ს გენერალური მდივანი მიიჩნევს, რომ დონალდ ტრამპის თეთრ სახლში დაბრუნების შემდეგ, მან ჩიხიდან გამოიყვანა რუსეთ-უკრაინის ომის სიტუაცია, – ამის შესახებ მარკ რუტემ დონალდ ტრამპსა და რუსეთის პრეზიდენტს, ვლადიმერ პუტინს შორის სატელეფონო საუბრის შეფასებისას აღნიშნა.
„აშკარაა, რომ ამერიკის ადმინისტრაცია ძალიან ჩართულია, მჭიდროდ კოორდინირებს ევროპელ კოლეგებთან და საბოლოოდ, რა თქმა უნდა, უკრაინასთან. მე ვფიქრობ, რომ ეს ძალიან პოზიტიურია“, – განაცხადა მან.
რუტე ასევე „პოზიტიურ მომენტად“ მიიჩნევს იმ ფაქტს, რომ ტრამპმა „დაიწყო კომუნიკაციის არხების გახსნა“ რუსეთის პრეზიდენტთან.
„რა თქმა უნდა, იმედი გვაქვს შედეგის რაც შეიძლება მალე, მაგრამ ეს ყოველთვის შესაძლებელი არ არის რეალურ ცხოვრებაში, რადგან ეს რთული კონფლიქტია. ამიტომ, კვლავ ვფიქრობ, რომ ის, რასაც ამერიკელები აკეთებენ, ძალიან მნიშვნელოვანია. კერძოდ, მნიშვნელოვანია, რომ ისინი კონსულტაციებს გადიან ევროპელებთან, უკრაინასთან და ჩვენ უნდა ვაკეთოთ ეს ნაბიჯ-ნაბიჯ. ვნახოთ, რა მოხდება ამ და მომდევნო კვირაში“, – აღნიშნა მან.
ნატო-ს გენერალური მდივანი ასევე აღნიშნავს, რომ ტრამპის მიმართ მადლიერები უნდა იყვნენ რადგან ის იკავებს ახლა ამ პოზიციას, ლიდერის როლს.
„კარგია და პოზიტიური, რომ ამერიკის პრეზიდენტმა დაუყოვნებლივ დაურეკა უკრაინის პრეზიდენტს და ევროპელ ლიდერებს, მათ შორის ევროკომისიის პრეზიდენტს“, – განაცხადა მან.