ელისეს სასახლეში უარყოფენ, რომ საფრანგეთის პირველმა ლედიმ ბრიჯიტ მაკრონმა თავის მეუღლეს, საფრანგეთის პრეზიდენტ ემანუელ მაკრონს სილა გააწნა.
ინციდენტის ამსახველი კადრები ვიეტნამშია გადაღებული, სადაც წყვილი ვიზიტით ჩავიდა. ვიდეოზე ჩანს, რომ ბრიჯიტ მაკრონი მეუღლეს ხელით ეხება, რის გამოც საფრანგეთის პრეზიდენტი უკან დგამს ნაბიჯს. მოგვიანებით გამოქვეყნებულ კადრებზე ჩანს, როგორ ჩამოდის მაკრონი ტრაპზე ცოლთან ერთად. მან მეუღლეს ხელი გაუწოდა, მაგრამ ბრიჯიტმა ქმარს ხელი არ ჩაჰკიდა.
Le Figaro წერს, რომ თავიდან ელისეს სასახლე კადრების ავთენტურობას უარყოფდა, თუმცა მოგვიანებით წყარომ გამოცემას დაუდასტურა, რომ ბორტზე მეუღლეებს შორის უმნიშვნელო კამათს ჰქონდა ადგილი, თუმცა მომხდარს „სიახლოვის მომენტი“ უწოდა.
„ეს იყო მომენტი, როდესაც პრეზიდენტი და მეუღლე ვიზიტის დაწყებამდე ბოლოჯერ მოდუნდნენ და გაიცინეს. ეს სიახლოვის მომენტია“, – უთხრა წყარომ ჟურნალისტებს.