პარლამენტის გარემოს დაცვისა და ბუნებრივი რესურსების კომიტეტმა სარატიფიკაციო შეთანხმებებს მხარი დაუჭირა.
კომიტეტის სხდომაზე ინფრასტრუქტურის მინისტრის მოადგილემ მზია გიორგობიანმა მთავრობის მიერ რატიფიცირებისათვის წარმოდგენილი „საქართველოსა და სკანდინავიურ გარემოს საფინანსო კორპორაციას შორის საგრანტო შეთანხმების“ N1 ცვლილება და „საქართველოსა და სკანდინავიურ გარემოს საფინანსო კორპორაციას შორის სასესხო შეთანხმების N1 ცვლილება წარადგინა.
მომხსენებლის ინფორმაციით, სასესხო და საგრანტო შეთანხმებების ცვლილებები თანხის ათვისების ვადის 2027 წლის ბოლომდე გადაწევას უკავშირდება. მისივე თქმით, წარმოდგენილი შეთანხმებების თანახმად, საქართველოს სხვადასხვა მაღალმთიანი სოფლების სასკოლო ინფრასტრუქტურის რეაბილიტაცია და მათი ენერგო ეფექტური სისტემებით უზრუნველყოფა იგეგმება. მინისტრის მოადგილის განცხადებით, 6 სკოლაში უკვე დაწყებულია სარემონტო სამუშაოები, ხოლო დარჩენილი 6 სკოლის წინამოსამზადებელი პროცესები მიმდინარეობს.
სხდომაზე, ფინანსთა მინისტრის პირველმა მოადგილემ გიორგი კაკაურიძემ საქართველოს მთავრობის მიერ რატიფიცირებისთვის წარმოდგენილ „საქართველოსა და აზიის განვითარების ბანკს შორის სასესხო შეთანხმებაზე ისაუბრა.
მომხსენებლის ინფორმაციით, სასესხო შეთანხმების თანახმად, რომელიც 98 მილიონ ევრომდეა, ენერგიის შემნახველი ბატარეების სისტემის მოწყობა იგეგმება.
მისივე თქმით, პროექტის განხორციელება საქართველოს ენერგეტიკული სისტემის მდგრადობის, მოქნილობასა და უსაფრთხოების ამაღლებას და ამასთანავე, ელექტროენერგიის ხარისხის გაუმჯობესებას უზრუნველყოფს.