ჩვენ უნდა ვიზრუნოთ ჩვენს უსაფრთხოებაზე. ეს არის სამეზობლოსთან მოლაპარაკება, რათა საზღვრები იყოს დაცული და მიგრაციის ტალღებმა ჩვენს უსაფრთხოებას საფრთხე არ შეუქმნას, – განაცხადა „დღის ქრონიკაში” ისტორიკოსმა სოსო მანჯავიძემ ისრაელ-ირანს შორის მიმდინარე დაპირისპირებაზე და ბირთვულ საფრთხეებზე საუბრისას.
მისივე თქმით, უკვე ნათლად ჩანს, რომ დაპირისპირებული მხარეები ერთმანეთის ბირთვული ობიექტების დაბომბვას არ ერიდებიან.
„ბირთვული კატასტროფის შესახებ მე არ ვარ პირველი და უკანასკნელი, ვინც ეს დავწერე. მოგეხსენებათ აგერ, ებრაული საიტები, ტელევიზიები გადმოსცემენ იმას, რომ დაზიანებულია ატომური ცენტრი ირანში და არავინ ზრუნავს იქ მიმდინარე პროცესზე. რაც იმას ნიშნავს, რომ ეს რადიაციული ფონი იზრდება. რა თქმა უნდა, შეიძლება ეს არ შეესაბამებოდეს სიმართლეს და იყოს ომის ბურუსი, მაგრამ ფაქტია, რომ დაპირისპირებული მხარეები არ ერიდებიან ერთმანეთის ბირთვული ობიექტების დაბომბვას. ბირთვული საფრთხის გარდა, მოგეხსენებათ, რომ ირანი არის 95 მილიონიანი სახელმწიფო და ირანის დესტაბილიზაცია ასე ახლოს არის, იმიტომ, რომ ისრაელი ფაქტობრივად ანადგურებს ირანის ინფრასტრუქტურას, ხელმძღვანელობას. გავრცელდა მონაცემები, რომ ირანის უმაღლესი სასულიერო ხელმძღვანელი გადააფრინეს მოსკოვში, თუმცა არ ვიცით ეს შეესაბამება თუ არა სიმართლეს, შეიძლება უბრალო პროპაგანდაა. იქ დაღუპულია ირანის პოლიციის უფროსი, ძალიან ბევრი ხელმძღვანელი ირანის ხელისუფლებისა. ამის გარდა, განუწყვეტლივ ნადგურდება ირანის ინფრასტრუქტურა. რა თქმა უნდა, ზიანი ადგება ისრაელსაც, თუმცა ეს ირანისთვის გაცილებით უფრო მტკივნეულია.
ჩვენ უნდა ვიზრუნოთ ჩვენს უსაფრთხოებაზე. პირველ რიგში ეს არის სამეზობლოსთან მოლაპარაკება, რათა საზღვრები იყოს დაცული და მიგრაციის ტალღებმა ჩვენს უსაფრთხოებას არ შეუქმნას საფრთხე. კონტროლი საზღვრებზე, რადიაციული ფონის კონტროლი. საფრთხე ძალიან დიდია, ამიტომ საჭიროა სამეზობლოსთან პოლიტიკის სასწრაფო შეთანხმება, ვგულისხმობ სასაზღვრო პოლიტიკის გამკაცრებას. არ უნდა დავუშვათ დიდი მიგრაციული ტალღების შემოსვლა“, – განაცხადა მანჯავიძემ.