რატომ შეწყვიტა კოალიცია “ცვლილებებისთვის” ლიდერმა, ელენე ხოშტარიამ შიმშილობა, თუ მისი მოთხოვნა იყო ის, რომ არცერთ ოპოზიციურ პარტიას არ მიეღო მონაწილეობა მოახლოებულ თვითმმართველობის არჩევნებში, როდესაც ეს მოთხოვნა არ შესრულებულა – ამის შესახებ კოალიცია “ერთიანობა – ნაციონალური მოძრაობის” წევრმა, ირაკლი ფავლენიშვილმა “ღამის კურიერის” ეთერში ისაუბრა.
მისი თქმით, ელენე ხოშტარიას მოთხოვნა ეხებოდა არა არჩევნებში მონაწილეობის საკითხს, არამედ ოპოზიციის ერთიანობასა და საპროტესტო მუხტის მატებას, რისი მიღწევაც მოხერხდა.
“როდესაც კონტექსტიდან ამოგლეჯილად იხმარებოდა მისი ეს ფრაზა არჩევნებში მონაწილეობასთან დაკავშირებით, ამის შემდეგ, ელენე ხოშტარიამ დაწერა ფეისბუქ პოსტი, სადაც ძალიან მკაფიოდ უპასუხა, რომ მისი მოთხოვნა და მთავარი დღის წესრიგი, რის გამოც მან პროტესტის უკიდურეს ფორმას მიმართა, იყო ის, რომ უნდა მომხდარიყო რეალური ოპოზიციური ძალების გაერთიანება და საპროტესტო მუხტის მატება, მისი ამ ქმედებიდან გამომდინარე, უნდა მომხდარიყო გაერთიანება, მობილიზაცია…
მას ესმის, რომ ეგზისტენციალური საფრთხის წინაშე დგას ქართული სახელმწიფო, ამიტომაც ყველანაირ რისკზეა წამსვლელი – ზოგი ჯანმრთელობას სწირავს, ზოგი სიცოცხლეს წირავს, ზოგი თავისუფლებას, ზოგი ყველაფერს ერთად სწირავს ამ ბრძოლაში. ის მისთვის და თავისი ჯანმრთელობისთვის სახიფათო ნაბიჯზე წავიდა იმიტომ, რომ მისი აზრით, ეს ძალიან სწორია. ამ ერთიანობის ნაკლებობის განცდა მას ჰქონდა, მათ შორის, ისეთ მნიშვნელოვან საკითხზე, რომელიც ყოფდა საზოგადოებას, მათ შორის, ოპოზიციაში და საჭირო იყო პროცესების დაჩქარება, რომ უფრო მკაფიო ყოფილიყო პოზიცია, რომ ჩვენ, უახლოესი კვირების მანძილზე, სხვადასხვა ეთერში იმაზე კი არ გვესაუბრა, ვიღებთ თუ არ ვიღებთ მონაწილეობას, არამედ, – რატომ არ ვიღებთ, როგორ არ ვიღებთ, რა კამპანიას ვაწარმოებთ და ა.შ. ელენე ხოშტარიას ეს დღის წესრიგი გატარდა, ამ შემთხვევაში, გვაქვს უპრეცედენტო მკაფიოობა და ერთიანობა,” – განაცხადა ირაკლი ფავლენიშვილმა.