ხვიჩა კვარაცხელიას „პარი სენ-ჟერმენი“ მსოფლიო საკლუბო ჩემპიონატის მეოთხედფინალში მიუნხენის „ბაიერნს“ დაუპირისპირდა 2:0 დაამარცხა და ნახევარფინალში გავიდა.
საქართველოს ნაკრების თავდამსხმელმა თამაში პარიზელთა ძირითად შემადგენლობაში დაიწყო და პსჟ-ში ერთ-ერთი ყველაზე აქტიური იყო – ხვიჩას შეეძლო გატანა, მაგრამ მახვილი კუთხიდან კარს ოდნავ ააცილა, მისი გადაცემით საგოლე მომენტიც შეიქმნა, 35-ე წუთზე კი მცველს გასცდა, მაგრამ „ბაიერნი“ ნოიერმა გადაარჩინა.
გერმანელები უპირატესობას მეორე ტაიმშიც ფლობდნენ, ფრანგებმა კი ორი მომენტი კვარაცხელიას აქტიური თამაშის შედეგად შექმნეს. ხვიჩამ 48-ე წუთზე მეკარესთან პირისპირ ბრედლი ბარკოლა გაიყვანა, მაგრამ „ბაიერნი“ ნოიერმა ამჯერადაც გადაარჩინა. 74-ე წუთზე კვარაცხელიას აქტიურობის შემდეგ ნოიერმა შეცდომა დაუშვა, ბურთი უსმან დემბელეს მიუვიდა, ფრანგების ფორვარდმა ცარიელ კარში დაარტყა, მაგრამ ააცილა.
ამ ურთულეს ბრძოლაში პარიზელებმა მიზანს მაინც მიაღწიეს – 78-ე წუთზე სწრაფი კონტრშეტევა დეზირე დუემ დააგვირგვინა და „პარი სენ-ჟერმენი“ წინ გაიყვანა. ხუთ წუთში პაჩო ლეონ გორეცკასთან უხეშობისთვის მოედნიდან გააძევეს და ფრანგების მწვრთნელმა, ლუის ენრიკემ დაცვის გასაძლიერებლად ხვიჩა კვარაცხელია მცველით, ბერალდოთი შეცვალა.
90+2-ე წუთზე ლუკა ერნანდესმაც წითელი ბარათი მიიღო. ცხრა მოთამაშით დარჩენილმა პსჟ-მ გერმანელებს მეორე გოლიც გაუტანა და ნახევარფინალში გავიდა, სადაც 9 ივლისს მადრიდის „რეალისა“ და დორტმუნდის „ბორუსიას“ წყვილის გამარვებულს დაუპირისპირდება.