რუსთავის მერიასა და ივანე ჯავახიშვილის თბილისის სახელმწიფო უნივერსიტეტს შორის გაფორმებული მემორანდუმის თანახმად, რუსთავში, ქალაქის ისტორიაში ყველაზე მასშტაბურ არქეოლოგიურ ექსპედიციაში, სტუდენტებიც იღებენ მონაწილეობას. რუსთავის ისტორიული ციხის ტერიტორიაზე, არქეოლოგიური კვლევა, რუსთავის მერიისა და საქართველოს კულტურის სამინისტროს ორგანიზებით, 17 ივლისს დაიწყო და პირველი ეტაპი ნოემბერში დასრულდება.
რუსთავის მერიამ, თბილისის ივანე ჯავახიშვილის სახელობის თბილისის სახელმწიფო უნივერსიტეტთან, ურთიერთთანამშრომლობის მემორანდუმი, არქეოლოგიური ექსპედიციის მუშაობის პროცესში, ახალგაზრდების ჩართვის მიზნით გააფორმა. მემორანდუმს ხელი რუსთავის მერმა ნინო ლაცაბიძემ და ივანე ჯავახიშვილის სახელობის თბილისის სახელმწიფო უნივერსიტეტის რექტორმა ჯაბა სამუშიამ მოაწერეს.
,,რუსთავის ისტორიაში ყველაზე მასშტაბური არქეოლოგიური ექსპედიცია მიმდინარეობს. არქეოლოგიური გათხრები, ციხის ტერიტორიაზე აღმოჩენილი მე-9 საუკუნის სასახლის კვლევით დავიწყეთ. ივანე ჯავახიშვილის სახელობის თბილისის სახელმწიფო უნივერსიტეტთან, ქალაქის მერიამ მემორანდუმი გააფორმა და სწორედ ამ მემორანდუმის საფუძველზე აქვთ არქეოლოგიურ ექსპედიციაში ჩართვის შესაძლებლობა სტუდენტებს”, – განაცხადა რუსთავის მერმა ნინო ლაცაბიძემ.
მემორანდუმის თანახმად, თსუ-ს სტუდენტებს, რუსთავის არქეოლოგიურ ექსპედიციაში, საკვლევ-საძიებო და საველე სამუშაოებში მონაწილეობის და სტაჟირების შესაძლებლობა აქვთ.
,,ქალაქ რუსთავში ძალიან მნიშვნელოვანი არქეოლოგიური ექსპედიცია დაიწყო. მერიის მხარდაჭერით, ქალაქის ისტორიულმა მუზეუმმა რუსთავის ციხის ტერიტორიაზე არსებული სასახლის არქეოლოგიური გათხრები დაიწყო. ეს ექსპედიცია, რუსთავის ციხის ახალი სიცოცხლის დასაწყისი იქნება და ვფიქრობ, რომ როგორც უნივერსიტეტის პროფესორ-მასწავლებლები, ასევე სტუდენტები, აქტიურად ჩაერთვებიან ამ ძალიან საინტერესო პროექტში”, – განაცხადა ივანე ჯავახიშვილის სახელობის თბილისის სახელმწიფო უნივერსიტეტის რექტორმა, აკადემიკოსმა ჯაბა სამუშიამ.
უნივერსიტეტში გამართულ შეხვედრას, თსუ ჰუმანიტარულ მეცნიერებათა ფაკულტეტის დეკანი დარეჯან თვალავაძე, არქეოლოგიის სასწავლო-სამეცნიერო ინსტიტუტის ხელმძღვანელი ვახტანგ ლიჩელი, რექტორის მოადგილეები კახა ჭეიშვილი და ერეკლე ასტახიშვილი, ასევე ისტორიკოსები და არქეოლოგები ესწრებოდნენ.
,,მემორანდუმი რამდენიმე თვალსაზრისით არის უაღრესად მნიშვნელოვანი. პირველ რიგში, ეს უნივერსიტეტისთვის არის კიდევ ერთი დამატებითი და სრულიად განსაკუთრებული შესაძლებლობა, იმისა, რომ ჩვენმა სტუდენტებმა პრაქტიკული გამოცდილება მიიღონ შუა საუკუნეების არქეოლოგიური ძეგლების კვლევაში, მითუმეტეს ისეთ არაჩვეულებრივ არქეოლოგიურ ძეგლზე, როგორიც რუსთავის ციხე და რუსთავის სასახლეა. ეს მრავალფენიანი არქეოლოგიური ძეგლია, რომელიც ძალიან ფართო შესაძლებლობას აძლევს ყველა დაინტერესებულ პიროვნებას და არამარტო სტუდენტებს, რომ საკუთარი ძალისხმევა მოახმარონ ჩვენი წარსულის შესწავლას”, – განაცხადა არქეოლოგიის სასწავლო-სამეცნიერო ინსტიტუტის ხელმძღვანელმა ვახტანგ ლიჩელმა.
რუსთავის ციხეზე არქეოლოგიურ ექსპედიციაში მოსახლეობის და ახალგაზრდების ჩართვის მიზნით, ქალაქის მერიამ მოხალისეთა სარეგისტრაციო ბმული ერთი თვის წინ გამოაქვეყნა. აპლიკაცია, როგორც ანაზღაურებად, ისე მოხალისეობრივ პოზიციებს სთავაზობს მსურველებს და ყველასთვის ხელმისაწვდომია. ექსპედიციის წევრობის სურვილი კი უკვე 100-მდე მოხალისემ და არქეოლოგმა გამოთქვა.
რუსთავის ისტორიული ციხის ტერიტორიაზე, ყველაზე ძველი ნასახლარი, შუა ბრინჯაოს ხანით თარიღდება. ისტორიულ წყაროებში, რუსთავი, მცხეთასთან, ურბნისთან და უფლისციხესთან ერთად ქალაქად, ძველი წელთაღრიცხვის IV საუკუნიდან მოიხსენიება. ახალი წელთაღრიცხვის IV საუკუნიდან, კი აქ ქართველი უფლისწულების სასახლე-საუფლისწულო ქალაქი იყო.