საქართველოს შინაგან საქმეთა მინისტრი, გელა გელაძე, შინაგან საქმეთა სამინისტროს აკადემიას ეწვია, პოლიციელთა საბაზისო მომზადების პროგრამის კურსდამთავრებულებს შეხვდა და სასწავლო დაწესებულების ინფრასტრუქტურა დაათვალიერა.
გელა გელაძემ კურსდამთავრებულებს პროფესიული მომზადების პროგრამის დასრულება მიულოცა, სერთიფიცირებულ ოფიცრებს პოლიციელის პროფესიის არჩევისთვის მადლობა გადაუხადა და შინაგან საქმეთა სამინისტროს რიგებში წარმატებული საქმიანობა უსურვა.
შინაგან საქმეთა მინისტრსა და მის მოადგილეს – შალვა თადუმაძეს, უმასპინძლა აკადემიის რექტორმა – ლელა ჩიქოვანმა, რომელმაც მათ დეტალურად გააცნო სასწავლო დაწესებულების საქმიანობის ძირითადი მიმართულებები, სამართალდამცავთა პროფესიული მომზადების პროგრამები, თანამედროვე სასწავლო მიდგომები, რაც ეფექტიანი სისტემური სწავლების უზრუნველყოფაში მნიშვნელოვან როლს ასრულებს.
აკადემიის რექტორმა განსაკუთრებული ყურადღება გაამახვილა სწავლების პროცესში მეცნიერულ-ტექნიკური და მაღალტექნოლოგიური რესურსების ინტეგრაციაზე და იმ სტანდარტებზე, რომლებიც სამართალდაცვით სფეროში არსებულ გამოწვევებზე მორგებული კადრების ჩამოყალიბებას ემსახურება.
შინაგან საქმეთა სამინისტროს აკადემიაში, გელა გელაძემ, თეორიული და პრაქტიკული სწავლებისთვის განკუთვნილი აუდიტორიები, კრიმინალისტიკური ლაბორატორია, საგამოცდო სივრცეები დაათვალიერა, ასევე, მოინახულა დახურული, ნახევრად ღია და ვირტუალური ტირი, სადაც მსმენელები ოპერატიული რეაგირების უნარების გაძლიერებისათვის განკუთვნილ პრაქტიკულ მომზადებას გადიან.
ასევე, გელა გელაძემ, შსს-ს აკადემიის არქივის მიერ დაცული მნიშვნელოვანი დოკუმენტების საგამოფენო სივრცე დაათვალიერა, სიმულაციურ სწავლებასა და კურსანტთა ფიზიკური მომზადების კურსს დაესწრო.
