სახელმწიფო დეპარტამენტის მიერ ადამიანის უფლებების შესახებ მომზადებული ყოველწლიური ანგარიშის პროექტი მიუთითებს, რომ ტრამპის ადმინისტრაცია აპირებს მნიშვნელოვნად შეამციროს აშშ-ის მთავრობის კრიტიკა იმ უცხო ქვეყნების მიმართ, რომლებსაც დარღვევების ფართო ისტორია აქვთ. ინფორმაციას ამის შესახებ ამერიკული გამოცემა The Washington Post-ი ავრცელებს.
სალვადორის, ისრაელისა და რუსეთის შესახებ ადამიანის უფლებათა ანგარიშების სამუშაო ვერსიები, რომელთა ასლებსაც The Washington Post-ი გაეცნო, მნიშვნელოვნად მოკლეა გასული წლის ბაიდენის ადმინისტრაციის მიერ მომზადებულ ანგარიშებთან შედარებით.
მათ ამოღებული აქვთ ყველა აღნიშვნა LGBTQ+ პირებზე ან მათ მიმართ ჩადენილ დანაშაულებზე, ხოლო დანარჩენი დარღვევების აღწერები შერბილებულია.
The Washington Post-ი აღნიშნავს, რომ სალვადორის, ისრაელისა და რუსეთის შესახებ გაჟონილი სამუშაო ანგარიშები ხაზს უსვამს იმას, თუ როგორ რადიკალურად გადახედა ტრამპის ადმინისტრაციამ ამერიკის როლს ადამიანის უფლებების დაცვის გლობალურ საქმეში.
ოფიციალური წყაროს განცხადებით, ტრამპის ადმინისტრაცია ყურადღებას მიაქცევს გარკვეულ საკითხებს, მათ შორის სიტყვის თავისუფლების უკუსვლას იმ ქვეყნებში, რომლებიც აშშ-ის მოკავშირეები არიან.