ჩვენ საქმე გვაქვს პოლიტიკურ კორუფციასთან და ეს სხვა არაფერი შეიძლება იყოს, – განაცხადა იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა საჯარო რეესტრში დარეგისტრირებულ დოკუმენტთან დაკავშირებით, რომლითაც „ლელოს“ ლიდერის მეუღლემ უწყებას მას შემდეგ მიმართა, რაც ხაზარაძეების და გერმანიის ელჩის გარიგების შესახებ ინფორმაცია საჯარო გახდა და შემოსავლების სამსახურმა საკითხის მოკვლევა დაიწყო.
„ამ პოლიტიკურ კორუფციაში სამწუხაროდ თანამონაწილე არის გერმანიის ფედერაციული რესპუბლიკის საელჩო და ელჩი ფიშერი, რომელიც ისევ და ისევ „დუმილის უფლებას“ იყენებს ამ საქმესთან მიმართებით. სწორედ ამ დუმილით ფაქტობრივად ხელს აწერს იმას, რომ მართლაც საქმე გვქონდა ისეთ გარიგებასთან, რომელიც მწყრალად არის, როგორც საქართველოში მოქმედ კანონმდებლობასთან, ისე ზოგად სტანდარტებთან“, – აღნიშნა თორნიკე ჭეიშვილმა.